Pyllait paidbah u MLA Jowai iaki artylli ki trok kit ñiut

Syllad | The Rising MeghalayaJuly 2, 2021

U MLA Jowai ma Wailadmiki Shylla haka sngi Thohdieng ula pyllait paidbah iaki ar tylli ki trok kit ñiut jong ka Jowai Municipal Board (JMB).

Ïa kine ki trok la thied lyngba ka 14th Finance Commission. 

Haka jingpyllait paidbah ia kine ki trok la pynlong iaka jingialang kaba lyngkot ha phyllaw ka ophis treikam JMB ha Khimusniang, Jowai haka jingialang kaba pyniaid da u chairman F War. Nalor u ma Wailadmiki la iadonlang u PK Boro CEO JMB, u Ma Octomewot Lamin Nominated MDC, ki nongialam ka synjuk waheh shnong Jowai u Ma Alan Niangti bad u LD Lakiang nalor kiwei kiwei.

U ma Wailadmiki Shylla haba kren ula ong ba ka jingioh ia kine ki trok kit ñiut kalong ka jingkyrkhu iaka JMB ba kan ioh ban shakri ia u paidbah ha kaban lum ban lang iaki ñiut.

“Baroh ngi tip iaka jingeh jong ka Jowai Municipal Board khamtam ha kaba iadei bad ka jingbym ioh jaka ba paka ban bret ñiut, hynrei ka jingiakren ka dang iaid shakhmat bad ka JHADC kala ai ksai ba kan ai iaka jaka bad yn shna da kaba long paka katkum ka juk kaba mynta ban suk haka rukom bret ñiut,” la ong u ma Wailadmiki.

Sha Marten hap leit bret ïaki ñiut ba mih na sor Jowai.

Ula ai khublei iaki nongtrei ka JMB ba wat hapdeng ka jingduh tulop bun bun bnai, hynrei kim shym la klet pat iala ka kamram ban pyndep ban ai ka jingshakri ia u paidbah hapdeng har rukom ki jingeh ba ki iakynduh.

“Nga la iakren halor ka jingeh ka Jowai Municipal Board bad u Myntri ka tnad Urban ha kaba mynta ka kynti kan sa poi bun ka song jingiarap kaba la kot da ki klur tyngka ban ioh sdang ne pyntrei iaki kam tei jingtei hapoh ka jingpeit ka Municipal,” la ong u ma Wailadmiki bad ula bynrap ba ula shimkhia ban peit iaki jingeh jong ki shnong kiba la pynhap ha ki jaka sor namar ba duna ki lad jingiarap naka sorkar ban pynroi pynpar iaki shnong ki thaw.