Pyllait paidbah u CM ia ka CPPP na ka bynta ki jingmyntoi ki Processing Unit kiba heh ha ka Jylla

Syllad | The Rising MeghalayaNovember 29, 2024

U Myntri Rangbah ka Jylla u Conrad K Sangma ha ka 27 tarik Naiwieng u la plie paidbah ia ka Community Public Private Partnership (CPPP) program na ka bynta ka jingmyntoi ban seng ia ki Processing Unit kiba heh hapoh ka Jylla ha ka jingiadon lang ka Myntri ka Tnad ka koit ka khiah ka Kong Ampareen Lyngdoh.

Ha ka jingkren u CM u la ban jur ba kane ka jingplie paidbah ka dei ka jingthmu ban pynkylla dur ban kyntiew ia ka jingim jong ki nongrep ha ka jylla bad ban ai kam ai jam da kaba kdew ruh ia ka jingdonkam ban iatreilang hapdeng ki nongiashim bynta bapher bapher kynthup ia ki Co-operative Society, ki Self Help Group bad ki riew shimet ban kyntiew ia ka jingpynmih ia ki mar rep bad ka jingkyntiew ia ka kamai kajih.

“Katba ngi dang iakren shaphang ki nongiashim bynta bapher bapher, la ka long ki kynthei jong ka jylla jong ngi bad ki mat bapher bapher kiba iadei bad ka koit ka khiah ne ki samla ka jylla kiba don ia ki mat bapher bapher naduh ka pule puthi haduh ka jingplielad ha ki kam ialehkai sport, ka rwai ka siaw bad ka jingpyniasoh ha ki kam bapher bapher ne la ka long shaphang ki nongrep, ngi la sngewthuh ba ka don ka jinglah kaba khraw ha baroh ki nongshim bynta bad ki kynhun bapher bapher kiba don hangta ha ka jylla jong ngi bad lait na ki skhim ba ju don lypa na ka Sorkar India bad katto katne ki skhim na ka Sorkar Jylla, ki don ruh ki prokram, policy bad ki buit treikam ban rah ia ki shakhmat,” ong u Conrad.

Nalor kata u CM u pyntip ruh ba ki kynhun Integrated Village Co-operative Society (IVCS)  bad ki kynhun pynmih mar rep kiba ioh jingmyntoi bha ha kine ki khyndiat snem ba la dep lyngba ki sienjam ba la shim da ka sorkar bad ong ruh ba ka jylla kam shym la don ia ka lad ban pynmih bun jait ki mar ki mata katkum ka jingdawa jong ka iew ka hat, hynrei ka hap ban jied kyrpang ia ki jait mar kiba lah ban pyniaid iew kum u Sying, Shynrai, Tit Shitake bad kiwei kiwei. U la pynpaw ruh ka jingsngew hun halor ka jingiaid jong ki kam ki jam ban kyntiew ia ka rukom im jong ki nongrep bad ki cooperative society, hynrei u la ban jur halor ka jingdonkam ban shim shuh shuh ia ki sienjam ban kyntiew ia ka rep ka riang bad ka jingpynmih mar lyngba ki processing unit.

U CM u la khot shuh shuh ia ka sorkar ba kan bteng ban aijingkyrshan ia ki cooperative society bad ka jingdonkam ban kyntiew ia ki lad ki lynti na ka bynta ki nongrep. U la kyntu ruh ia ki nongshong shnong ban trei da ka jingaiti lut ban pynthikna ia ka jingjop jong ki karkhana pynmih mar bam kiba la buh.

Ka Sorkar Jylla kala tyrwa ruh ia ka jingbei tyngka kaba  haduh T.106 klur lyngba ka CPPP prokram ha Jylla.

Ha kane ka sngi, u Myntri Rangbah ula aiti ruh ia ka cheque kaba T.16 klur na ka bynta ka CPPP prokram bad T.2.55 klur kum ka bai seng ia ki Cooperative bapher bapher. Nalor kata ha kane ka prokram u la pyllait ruh ia ki Agri Response Vehicle kaba la thied lyngba ka CM Elevate.