Pyllait ka tnad Postal ia ka Special Cover, Stamp bad Envelope ka KHADC

Syllad | The Rising MeghalayaOctober 22, 2024

Ka Tnad Postal ka Sorkar Pdeng ha ryngkat ka jingiatreilang bad ka Meghalaya Postal Division ha ka 21 tarik u Risaw ka la pyllait paidbah ia ka Special Cover, Stamp bad ka Envelope jong ka Khasi Hills Autonomous District Council (KHADC) ha ka ‘Philatelic Exhibition Meghapex 2024’ kaba ar sngi ba la pynlong hapoh State Convention Centre.

Ha kane ka exhibition la wan ia don ryngkat lang ka DGP ka Jylla ka Kong Idashisha Nongrang, u Chief Postmaster Northeast Circle u Sanjiv Ranjan, u CEM ka KHADC Bah Pyniaid Sing Syiem, ki Executive Member, ki samla pule bad kiwei kiwei.

Haba kren sha ki lad pathai khubor u CEM ka KHADC u Bah Pyniaid Sing Syiem u la ong ba ka jingthmu jong ka Philatelic Exhibition Meghapex 2024′ ka long ban pyni nam ia ki stamp bapher bapher kiba la pyndonkam naduh ki por kiba la rim bah.

U Bah Pyniaid u la ong ba ka the ‘Philatelic Exhibition Meghapex 2024’ ka long kaba kongsan namar lyngba kane ka exhibition la kynthup ia ka KHADC ha ka Postal Service of India kum ka Special Cover ba la shong bad pynmih haduh 2000 kopi.

“Ha kane ka Philatelic Exhibition Meghapex 2024, ngi la lah ban pyllait ia ka Special Cover jong ka KHADC kaba la phah sha ka National Museum ha Delhi da u Postal Master ka North East Circle bad ia kaba yn phah biang sha ka District Council ban die ia kine ki stamp bad ka Council kan lah ruh ban pyndonkam ia kine ki stamp,” ong u CEM.

Nalor kata u Bah Pyniaid u la ong ba ka jingkynthup ia ka KHADC ha ka Postal Service lyngba ka Special Cover ka long ka jingkyrkhu bad ka dei ka jingithuh jong ka Sorkar India bad ka Special Cover ka ai ia ka jingbatai shaphang ka KHADC ha ka ktien Hindi, English bad Khasi.