Pyllait ka Kur Sookpoh Khadar Wyrnai Jowai yaki tiket lucky draw

Syllad | The Rising MeghalayaMarch 12, 2025

Ka Kur Sookpoh Khadar Wyrnai Jowai, kam  chi bynta ka Social Activities yong ka Kur haka 11 tarik Wisu (March) da pyllait paidbah ko yaki tiket Lucky Draw ha Yungwalieh ka Kur ha Chiliangraij Jowai, wei da pyllait da u Ma Taiwan War Divisional Soil Conservation Officer Territorial Division Jowai. Da emlang u Ma Lamphrang Pohktai Divisional Soil Conservation Officer Plantation Crops Division Jowai.

U Puramon Kynjing President ka Kur Sookpoh Khadar Wyrnai hawa klam yahkhmat ong u, kani ka fete ym du wow pynmih poisa nei bynta i emkam ka kur tangwa man ko leh chi bynta wow wanrah i ya maya pra kur, chi kha, chi man, neibhah waka Kur Sookpoh ym ku ko khlem em ki Kur wa e i kyrchan, ym heh ym kmai ko klem em ki kurim ki watang wa ki kha ki man wa e i kyrchan.

Heijooh i por ong u ka fete man haroh ko chi bynta u ya e mynsiem lang, wei em bynta lang ha iwon iwon yow rah yei burom ka kur.

Neiliang u kongsan u Ma Taiwan War wa u symbood kongsan u Ma Lamphrang Pohktai hei klam yong ki da e ki i kyrkhu kyrdooh yaka Kur Sookpoh Khadar Wyrnai deiwa yoluti wa iwon iwon i thmu ka Kur u man kiwa jop, wei hei yatoh wa ka fate wa daw man leh u man kawa yoh nong lyngba i noh kyllooid mynsiem lang da waroh kiwa chim bynta.

Da pynkut yaka yalang pyllait tiket Lucky Draw dei kyntien e khublei na u Marryngkat Syngkon wa i ngooh Blai na u Valentidio Paswet Asst General Secretary ka Kur Sookpoh Khadar Wyrnai.

Ya kini ki tiket Lucky Draw daw pynkhle haka 26 tarik Naitung (April), heiwa ka Prize wa nyngkong toh daka poisa 1,80,000 tyngka, ka  Prize wa ar ka poisa 60,000 tyngka, ka Prize wa le ka poisa 30,000 tyngka.

Katwa ki Consolation Prize 20 tylli kani leh daka poisa hi mar 1000 tyngka samen. I dor yong kani ka tiket toh 30 tyngka kawi.