Pulom ka jingkhot jingialang ka AO JHADC ban kynthup iaka shnong Thadmynri sha Elaka Nartiang; mih pyrshah ki paid nongshong shnong ka Raij Namdong
Ki paidbah bad ki nongialam ka Raij Namdong kiba la khie bitar halor ka jingthmu jong ka Jaintia Hills Autonomous District Council (JHADC) ban lum jingialang bad u nongpeit (caretaker) ka shnong Thadmynri kila mih paidbah sha surok ryngkat bad ki jingthoh pynrem iaka konsil haka 25 tarik Naiwieng.
Hashuwa kane ka Raij Namdong bad u Dolloi ka Elaka Nongjngi haka 23 tarik Naiwieng kila kren shai ba ki pyrshah jur iaka jingthmu jong ka JHADC ban kynthup iaka shnong Thadmynri sha ka Elaka Nartiang. Ka Administrative Officer JHADC ka khot jingialang mynta ka sngi (25 tarik Naiwieng), hynrei kane ka jingialang kala pulom noh hadien kane ka jingpyrshah.
Ban pynpaw iaka jingpyrshah ka Raij Namdong hapoh ka jingialam ki nongkitkam bad ki waheh shnong ryngkat bad ki paidbah kiba bun na ka shnong Namdong – A, Namdong B bad Mukhnang ki la mih paidbah sha surok mynta ka sngi naduh ka por 9 baje haduh 2 baje ban pyrshah ia ka jingthmu pynlong dorbar jong ka Administrative Officer (AO) ha Thadmynri ban pyni ia ka jingkwah jong ki ban leit sha Elaka Nartiang.
Ki paidbah ryngkat bad ki nongialam kila ap sha surok iaka Administrative Officer ha Namdong – B, ha ka surok ban leit sha Thadmynri, hynrei ka Administrative Officer (AO) kam shem la wan satia sha kane ka dorbar, kumta ki nongialam bad ki paidbah ka Raij Namdong ki la pynlong ia ka jingialang ha kane ka jaka ban pynpaw pyrthei iaka jingpyrshah jong ki.
La ong ba ka shnong Thadmynri ka dei ka jaka khlaw kaba hap hapoh ka jingpeit ka Raij Namdong, Elaka Nongjngi, hynrei ha kine ki khyndiat snem ka JHADC kala pynmih iaka jingpynbna ba ka Thadmynri ka hap hapoh u pud u sam ak Elaka Nartiang.
Ia kane ka jingialang la pyniaid da u Rangbah L. Pale Chairman Raij Namdong bad ki rangbah kiba la ai jingkren ha kane ka sngi ki kynthup ia u Waheh Raij L Lyngdoh, Secretary Raij I. Pakma Waheh Shnong Namdong – B Waheh Shnong Namdong – A Waheh Shnong Ladmyngngor, Waheh Shnong Mukhnang u Rangbah Apostol Shadap ki longkmie ka kong M. Tariang bad ka Kong R. Susngi.
Baroh kine ki nongkren kila pynpaw ia ka jingpyrshah bad jingsngewsih halor kane ka jinglehkulmar ka JHADC lyngba ka Administrative Officer (AO) namar baroh ki tip lut ia ka jingshisha naduh ba sdang haduh mynta ba kane ka Thadmynri ka dei ka jaka khlaw jong ka Raij Namdong.
La pynpaw ba ki briew na ki thain Nongkhroh Umladang bad na kiwei ki jaka ki la wan sha ki nongialam Raij bad ki la pan jaka ban rep kumta ka Raij Namdong da ka jingbun ka jaka namar ba dang duna briew ha kito ki snem ka la ai lad ba kin shong bad kin rep, kumta katba nang iaid ki sngi ki por ki la nangroi nangpar bad ka Raij Namdong ka la pyllong ia kane ka Thadmynri kum ka shnong lyngba ka jingiatrei lang bad u (L) Dolloi Lyngngong Snieh Dolloi ka Elaka Nongjngi bad ka Raij Namdong ym dei na ka Elaka Nartiang.
Hynrei mynta kaba pynsngewsih ia ngi ba kine ki briew kila kwah ban mih noh na kane ka jaka ban leit sha ka elaka Nartiang khlem kano kano ka daw bad ka jingpynshisha kaba biang namar ba ki dei tang ki briew kiba dang shu poi sha kane ka jaka dang da ki phew snem mynta, la ong ki nongialam raij Namdong.
Ki nongialam Raij kila pynrem jur iaka JHADC bad kynnoh ba ka kwah ban thaw jingklumar hapoh ka Raij Namdong da kaba kynthup iaka Thadmynri sha ka Elaka Nartiang.
Ka Raij Namdong ka kren shai ba ki briew ne ki nongshong shnong ki lah ban leit sha kano kano ka elaka, hynrei ia ka jaka puta kim bit ban kam hok nongkynti bad ban pyndonkam kaba ka raij kala ai sngewbha ba kin shong kin sah bad ba kin rep kin riang.
Facebook
Instagram
Youtube
Twitter
Leave a Reply