Puk mih u paidbah ki 6 shnong bad KSU ban pyrshah iaka jingtheh ñiut ha Mynkjai, yn iakhih sa ki nongialam shnong ha Jowai

Syllad | The Rising MeghalayaAugust 9, 2021

Ki paidbah naki 6 shnong bad ka Khasi Students’ Union (KSU) War Jaintia Circle haka sngi Nyngkong kila mih paidbah ban pyrshah iaka rai ka bor synshar district, West Jaintia Hills ban theh ñiut ha Mynkjai. Katba na ki nongialam shnong ka Jowai hapoh ka lama Synjuk Waheh Chnong Jowai ruh kila pynbna iakhih lashai ka sngi ba ar ki mih madan ban pyrshah iaka jingphiel ka sorkar ban pynkynriah iaki ñiut na Iawmusiang, Jowai.

Kane ka jingeh kala mih hadien bala phiel ka Jowai Municipal Board (JMB) ban pynlang pynlum iaki ñiut kaba mih na ki ïing ki sem bad ki iew ki hat ha sor Jowai kaba la wanrah iaka jingsma iwtung na kine ki jaka ba lumthup iaki ñiut.

Ka JMB hadien ka jingpyrshah ki 6 shnong ba kynthup iaka Mupyut, Pynthorlangtein, Umsalang, Madatyrpait, Moosakhia bad ka Skhenpyrsit bad ka KSU ha u bnai Lber kala sangeh ban pynlang ñiut. Hadien pat kala pynlang iaki ñiut bad leit bret sha Marten, Mawiong kaba la hap ban sangeh noh hadien ba la pyrshah ka seng samla shnong Mawlai.

Ka JMB kala pyrshang ban leit theh ïaki ñiut sha East Jaintia Hills ha ki krem dewiong ha Lamyrsiang, Elaka Sutnga bad hangne ruh ki nongshong shnong kila pyrshah bad wat iaki ñiut kiba la dep theh na ki trok la hap ban khar bad kit biang sha Jowai.

Ka bor synshar district haka 2 tarik u Nailar 2021, kala khot jingialang ia baroh ki shnong kiba don marjan bad ka Mynkjai haka jingiadonlang U Myntri Pynroi Sor u Ma Sniawbhalang Dhar, MLA Jowai Wailadmiki Shylla, u Thombor Shiwat, Chief Executive Member JHADC, katba na ki 6 shnong ki dang pan por ban ai iaka rai. Ha kane ka jingialang la kyntu iaki nongialam KSU ban pynsngewthuh iaki paidbah ban ailad iaka sorkar ban theh ñiut ha katei ka jaka ban pynjem ia kane ka jingeh tad haduh bala ioh iaka jaka ba pura.

Hadien ba ki 6 shnong ki shim por ban pyntip sha u DC, West Jaintia Hills, ula shim rai ban leit beit iaki ñiut ha Mynkjai naduh ka 9 tarik Nailar 2021.

Ki 6 shnong kila rai ban pyrshah iaka jingtheh niut ha Mynkjai haka jingialang kaba long ha ka 6 tarik Nailar. U Sub Divisional Magistrate, Amlarem Civil Sub Division haka Sngi U Blei, ula pynjari da ka kyndon aiñ 144 CrPC ban tem ia kino kino ki jingkynad kaba lah ban ktah iaka shongsuk shongsaiñ khnang ban iaid beit ka bret ñiut ka Jowai Municipal Board (JMB) ha Mynkjai.

Ka hukum kala khang pyrshah iaka jinglum paidbah palat iaka 5 ngut ban khang pyrshah ban rah iaki tiar pynmynsaw kaba kynthup iaki dieng, ki maw ha Mynkjai.

Kumban shu pynkynmaw ba katkum ka hukum kaba la pynmih u Sub Divisional Magistrate, Amlarem Civil Sub Division haka sngi U Blei, ula ong ba ka bor synshar district haka 2 tarik une u bnai Nailar kala lum jingialang ia baroh kiba don bynta ne ki shnong kiba marjan bad ka Mynkjai, ka jaka theh ñiut ka Jowai. Ha kane ka jingialang la rai ban bteng ban bret biang iaki ñiut kiba mih na sor Jowai da ka JMB tad haduh bala lah ban pynbiang iaka jaka theh ñiut ba pura kaban shimpor ban pynbiang haduh 6 bnai.

Ka hukum ka ong ba u Chief Executive Officer, JMB ul dei ban pynthikna ban peit ba ka jingtheh ïaki ñiut kam dei ban long kaba thurmur.

La bthah ia u CEO jong ka JMB ban pynthikna ban ka Solid Waste Management Rules 2016 kaba la pynteikam da ka Ministry of Environment, Forest and Climate Change haka 8 Iaiong (April) 2016 ba un bud ryntih ha kaban theh iaki ñiut ha Mynkjai ban shim iaka sienjam ban pyntreikam iaka jingdawa jong ki 6 shnong halor ka jingdawa ba ki shimkhia ba ka jingtheh niut ha katei ka jaka kalong kaba ktah iaka koit ka khiah bad kam dei satia katkum ka stad saian.

Hadien bala mih kane ka hukum ki paidbah jong ki 6 shnong bad ka KSU kila pynbna ban iaid shakhmat ban pyrshah bad mynta ka step kila mih puk ban khang iaka jaka rung ka jaka theh ñiut da ki maw bad lum paidbah ha katei ka jaka ban pyrshah iaka jingbret ñiut ha Mynkjai.

Ki nongialam shnong ka Synjuk Waheh Chnong Jowai kum ka dak ban pyrshah iaka jingphiel ka sorkar khmatam ka tnad pynroi sor lashai ka sngi 10 tarik Nailar kin pynlong iaka jingrah placard ban pyrshah iaka jingbym lah ban pynkynriah iaki ñiut na Iawmusiang Jowai.

Katkum ka jingpyllait khubor u Secretary Synjuk Waheh Chnong Jowai la ong ba kane ka jingiakhih kan sdang naduh ka 11 AM haduh 4 PM ha khmat ka DC Ophis Jowai bad ha ki jaka ban lumthup iaki ñiut.

Hadien kane ka jingpyrshah jong ki 6 shnong ka jingthmu ba theh ñiut ha Mynkjai kala pulom biang mynta ka sngi Nyngkong.