Plie u Myntri Rangbah ka Jylla ïa ki ba bun ki kam pynroi ha Williamnagar
U Myntri Rangbah ka jylla u Conrad K Sangma, haka 8 tarik Rymphang, ula plie ki jaka ai jinghikai bad ki Hostel jong ki khynnah shynrang bad kynthei ha Williamnagar Government College, ka Mini Outdoor Stadium bad ka shnat ba ïadei bad ki nongseng kam lajong kaba hap hapoh ka Entrepreneurship Promotion Development Program ha Williamnagar, East Garo Hills. Ha kane ka program lah donlang ruh da u Myntri ka tnad PHE uba dei MLA, ruh u MLA ka Williamnagar, u Marcuise N Marak, u MLA ka Rongjeng, u Jim M Sangma, MLA, Amlarem, Lakhmen Rymbui bad u Chief Secretary, D P Wahlang lait napdeng kiwei de ki heh na ka tnad pule puthi bad ki heh na ka district.
Ha ka jingkren ha katei ka program u Myntri Rangbah ka jylla u Conrad K Sangma, u la pynpaw ka jingsngewnguh ïa kito baroh kiba don bynta lang bad long ki atiar halor ka jingtei ïa ka iing building jong ka Williamnagar College kaba la ithuh da ka sorkar naduh u snem 2008 hapoh ka jingïalam jong u P A Sangma bad u Donkupar Roy kiba lah khlad noh na kane ka pyrthei hynrei hadien katei ym shym la don shuh ka jingtheh pisa ban pynbha iaka ka college. “Ban pynjanai halor ka pule puthi ka donkam ruh ka jingpynbha ïa ka college”, lah ong u Myntri Rangbah ka jylla. U la pyntip ba la pynlut haduh 500 klur naduh u snem 2018 halor ka jingpynbha bad pynjanai ki jaka pule kiba don ha kylleng ki jaka jong ka jylla ha kajuh ka por u lah pynpaw ka jingsngewkmen halor ka jinglah ban plie mynta ka sngi ïa ki mala ai jinghikai bad ki hostel jong ki khynnah.
“Ka don kajuh ka jingïadei halor ka jingplie ki lai tylli ki jingtei mynta ka sngi bad kane ka don jingïadei bad ki samla” u la pynpaw bad ong ba ka sorkar lyngba ki mat pyntreikam jong ka ka dei kaba lah aiti na ka bynta ki samla.
U la ong ba kam dei satia halor ka jingpule kaba bha hynrei kumjuh ruh halor ka lad kamai kajih ka dawa na ka bynta ki samla. Hadien kane u lah pynpaw halor kiba bun ki mat pyntreikam ba lah wanrah da ka sorkar jylla kum ka Prime Entrepreneurship, YESS Meghalaya, CM Elevate, Meghalaya Games, Grassroots Music program napdeng kiwei de kaba plie lad bad long ka rynsan na ka bynta kiba bun ki samla.
U Myntri Rangbah u lah ong ruh ba ki jaka sor kum ka Williamnagar bad Resu ki dei ban lah halor ka jingpynlong ïa ka Meghalaya Games ha ki sngi ban wan.
“Kumta katkum ka jingtyrwa da u MLA. Ka Williamnagar ngan sa mang ka pisa ba ka bynta ban shna iaka Track and Field Willamnagar Mini Stadium”. U la kdew ruh halor ki kam pynroi na ka bynta ka Williamnagar bad East Garo Hills ba kynthup kum ka jingpynitynnad ki shnong ki thaw, bad ka jingbuh ka Critical Care Unit bad ka hospital ba 50 jingthiah na ka bynta ki longkmie ba armet bad ki khyllung halor kane ka lah don ka jingmang pisa kaba kot sha ka T.50 klur.
Ha kaba pynkut, u Myntri Rangbah u la kyntu ia u Principal bad ki nonghikai jong katei ka college ba kin trei da ka jingieid khnang ba lah ban pynlong ïa kane ka college ka jaka pdeng halor ka jingnang jingstad, ka jingwadbniah bad ka jaka ai jinghikai kaba lah ban wanrah iaka jingkylla ha ka jingim jong u samla pule bad pyntip ruh ba shen ka kynhun Myntri sorkar shen kan ai iaka rai ban kynthup iaka Science bad Arts Stream ha Williamnagar, Baghmara bad Sohra Government college.
Na ka liang u Myntri ka tnad pule puthi pat u Rakkam A Sangma u lah kyntu ïa ki nonghikai ba kin trei shitom khnang ban wanrah iaka juh ka nam haka rukom sam jingnang jingstad kaba janai kum ki college ha sor ha Williamnagar Government College. Kumjuh ruh u la kyntu ïa ki samla ba kin pule minot bha ban wanrah ka nam ka burom jong ka college.
Facebook
Instagram
Youtube
Twitter
Leave a Reply