Plie u Myntri ia ka jingdro dur kaba don ia ka khana tang hapoh ka ophis DC

Syllad | The Rising MeghalayaJanuary 6, 2024

U Myntri ka Tnat Arts and Culture ka sorkar Jylla, u Bah Paul Lyngdoh haka 5 tarik Nohprah ha ryngkat ka jingiadon lang ka Deputy Commissioner (DC) ka East Khasi Hills, ka Kong R M Kurbah ula plie ia ka jingdro dur kaba don ruh ia ki khana tang jong uba rim bad ka jingiadei bad kolshor ia kaba la dro ha ka building ka DC Ophis.

Ia kane ka jingdro kaba itynnad bad pyniap biej ia kiba bun balang la dro pynwandur da u nongdro dur ba pawnam ka jylla u samla Mario Pathaw ha ka jingiatreilang bad ka Start India Foundation kumjuh bad ka Asian Paints.

Ha ka jingkren, u Bah Paul u la pyrto halor kane ka jingdro dur kaba itynnad bad ong ruh ba kane ka long ka nuksa ia baroh ki samla ka jylla ba kin lah ban kyntiew ia ki sap ki phong ki jong ki da kaba pyndonkam lyngba kum kine ki jait jingdro kiba don ka jingiadei bad ka kolshor kumjuh bad ka mei mariang.

Nalor kata u la ong ruh ba kum kine ki jait jingdro kin khring ruh ia ki nongwan shangkai pyrthei na kylleng bad ym tang ban pynpaw ia ka jingitynnad jong ki jaka ba la pynlong hi da ka mei mariang hynrei ruh ban kyntiew ia ki kam jngohkai pyrthei.

U la ong ruh ba ka jylla Meghalaya ka don shibun ban tyrwa sha ka pyrthei baroh kawei, kata la ka long ha ka liang ka jingdon jong ki kshaid kiba noh rymphum kiba don ryngkat ia ki khana nalor ki lum ki wah kiba itynnad.

Shuh shuh u la ong ba ha u snem 2023 ka Meghalaya ka la sakhi haduh jan kumba 15 lak ngut ki nongwan shangkai na kylleng ka pyrthei kaba pyni halor ka jingjop kaba khraw ia ka jylla