Plie u ma Lahkmen iaka New Nonglamin Combine Water Supply Scheme ba T.13 klur tam ban pynioh umdih iaka Nongtalang pyllun
U MLA ka Amlarem bad Chief Adviser ka sorkar Jylla Ma Lahkmen Rymbui ula plie iaka project sam umbam umdih kaba tip kum ka New Nonglamin Combine Water Supply Scheme (NNCWSS) haka 6 tarik u Naiwieng haka jingialang paidbah kaba long ha madan Remusan, Nongtalang, West Jaintia Hills District.
Ia kane ka New Nonglamin Combine Water Supply Scheme la pyntrei lyngba ka Jal Jeevan Mission (JJM) haka jinglut kaba kot T. 13,19,62,750/- na ka bynta ki 4 tylli ki shnong kumjuh ki marjan shnong.
Ki 4 tylli ki shnong ki ban ioh jingmyntoi na kane ka skhim ki kynthup ka New Nonglamin, Nongtalang Mission, Nongtalang bad Amsohmeheleng. Nalor kine ki 4 tylli ki shnong la pynrung thymmai ruh iaka shnong Kyrmia Padu bad shnong Roman kiba don marjan bad ka Area Nongtalang.
Iaka tyllong um la ai sngewbha da ki Kur Lai Kpoh, Pohsnem, Pohlynjar bad Pohduna haka jaka kaba tip kum ka Umdot kaba jngai 9 kilomitre.
U Ma Lahkmen Rymbui haka jingkren ula ong ban ioh ia kano kano ka jingdonkam hapoh ki shnong ki thaw hap ban mad iaki jingeh, hynrei wat shim iaki jingeh kum ki dieng pynkiang ban khang lad ban trei na ka bynta ka bha ka miat jong ka imlang sahlang.
Haba kyntu iaki nongshong shnong, u Ma Lahkmen ula ong ka um kadei kaba kongsan haduh katta katta bad ula ban jur iaki nongioh jingmyntoi ban don ka jingkitkhlieh bad kam trai iaka skhim da kaba sumar sukher iaki pipe um, ki jaka pynlang um na ka bynta ban bit ban biang ka shnong ka thaw.
Nalorkata ula pynpaw ruh ia ka jingsngewnguh ia ki heh ophisar jong ka tnad PHE kiba la trei shitom ban pyndep ia kane ka projek haka por kaba biang, na ka bynta ban pynpoi iaka umbam umdih sha man ki longiing jong ki nongshong shnong.
U Principal Secretary ka sorkar Jylla u SM Andaleeb Razi ula ong ka jylla Meghalaya kala leh bha haka JJM bad ka jingtreikam jong ka mission, mynta ka jingkhein kala kiew palat 82% bala lah ban pynpoi um ha iing bad ula ai khublei ia baroh ki nongshnong shnong kumjuh ka tnad PHE na ka bynta kane ka jingjop kaba khraw.
Nalor kata ula ong, haba aiti iaka skhim kam mut ba ki shnong kin kit ia baroh ka jingkitkhlieh hynrei kadei ka jingiatreilang ryngkat ryngkat bad ka tnad, ka shnong bad dkhot Village Water & Sanitation Committee (VWSC) khnang ba ka um kumjuh ki tyllong um kin long kiba neh bad lah ban pyndap pynbiang um iaki nongshong shnong.
Ha kane ka sngi la donlang ka Chief Engineer ka Kong BM Lyndem, u Waheh shnong Nongtalang Mission Ma ST Rymbui, waheh shnong Nongtalang Ma M Lyngdoh, waheh shnong New Nonglamin Ma Sanbor Nonglamin, ka Secretary shnong Amsohmeheleng Kong Elgina Myrchiang haka jingialang kaba la pyniaid da DSO PHE ka Kong D Ksoo.
Hadien ka jingialang u kongsan ula plie ruh ia u maw nongrim bad la pynphuh pynphieng iaka jingialang da ki jingshad bad jingrwai.
Facebook
Instagram
Youtube
Twitter
Leave a Reply