Plie u Conrad iaka jaka tyllait bad pyniaid iew shynrai Lakadong ha Thadmuthlong & Shangpung

Syllad | The Rising MeghalayaMay 10, 2022

U Myntri Rangbah ka Jylla Conrad K Sangma haka sngi ba ar ula wan hiar sha Rilum Jaintia ban plie paidbah iaki Collective Marketing Centre (CMC) haka shnong Thadmuthlong bad Shangpung Pohshnong.

Kane ka CMC ne ki jaka pynlang bad pyniaid iew ia u shynrai Lakadong kaba don ha Thadmuthlong ka dei jong ka Synroplang Village Organisation bad ha Shangpung kadei jong ka kynhun ki nongrep ka Farmers Union jong ka Shangpung Pohshnong.

Ka jingshna ia kine ki iing ban pynlang shynrai bad pyniaid iew ka dei lyngba ka Mission Lakadong.

Ha kane ka jingplie paidbah la iadonlang u MLA Raliang ma Comingone Ymbon bad ki ophisar sorkar bad kiwei kiwei.

U Conrad ula ong ba lyngba kane ka mission yn pynbun iaka jingpynmih ia u Shynrai Lakadong bad ban kyntiew arshah iaka ioh ka kot ki nongrep

“Kane ka dei ka jingpyrshang kaba khampher na bynta u musla ban kyrpang ka Meghalaya,” la ong u Conrad haka twitter.

Shuh shuh u Conrad un hiar sha Laskein ha Pamsna Mini Stadium ban shimbynta haka Lakadong Festival  bad ban plie paidbah ruh iaka Prime Hub bad CMC ha Laskein bad Mowtyrshiah.