Plie u Bah AL Hek ia ka Hospital bathymmai kaba 200 jingthiah ha Ri Bhoi

Syllad | The Rising MeghalayaMarch 30, 2024

Kan long da shisha ka jingkyrkhu kaba khraw na ka bynta ka jylla Meghalaya bad ia ka thain Shatei Lam Mihngi (North East) hi baroh kawei ha ka liang ki lad jingsumar kiba paka kumba long sha kiwei pat ki jaka sumar ha ki sorbah jong ka ri India hadien ba la lah ban plie paidbah ia ka hospital ba thymmai ka ARHI Multi Super Speciality Hospital kaba don ha ka shnong Mawsmai, Ri Bhoi District haka sngi Saitjain.

Ia kane ka hospital ka ban don kumba 200 jingthiah la wan plie da u Bah AL Hek, Myntri ka tnad Animal Husbandry & Veterinary ka sorkar Jylla bad u ba dei ruh u trai jong kane ka jaka sumar kum u kongsan ha ka jingiadon lang u Bah Sosthenes Sohtun, MLA ka Jirang Konstituensi, u Dr. Aman Warr, DHS ba la shongthait, Rangbah Shnong ka Mawsmai nalor kiwei kiwei ki riew pawkhmat.

Lah ban kdew, ba ka ARHI Multi Super Speciality Hospital ka dei kawei na ki jaka sumar pang paidbah kaba thymmai ia kaba yn khmih bad pyniaid da u Bah AL Hek, u Aibansharai Nongsiej, u Dr. Mahamaya Prasad Singh, Dr. Sandeep Rai Das, u Dr. Jadunarh Burogohain, u Dr. Rubaiya Anam, u Dr. Simranjeet Singh, u Dr. Firoz Ahmed, u Kamal Goyal bad u Parag Chutiya.

Ha kane ka sngi ba la sdang pyntreikam ia kane ka hospital la ioh ban plie shwa tang ia ka OPD Block bad yn sdang ban pyntreikam pura ia kane ka hospital hadien 2 ne 3 bnai.

Ha ka jingkren u Bah Hek u la pynpaw ka jingkmen kaba khraw ban sakhi ia ka jingnang iai urlong ka jingthmu ba bha jong u lem bad ka kynhun ban pynioh ia kane ka jylla bad ki jylla ka thain North East da kane ka jaka ai jingsumar pang ba bunjait ki jingsumar kumba long ha ki jaka sumar pang kiba heh hapoh ka ri India bad ka jingsumar ruh ka long kaba paka bad kaban pynsuk, pynmyntoi ia ki paidbah kiban wan shah sumar ha kane ka hospital.

“La shna ia kane ka jaka sumar ba 200 jingthiah nalor kiwei kiwei ki jingdonkam kiba bun halor ka thong ba la buh kaba long ban shakri ia u paidbah bad ka imlang sahlang bad ha kaba sdang mynta kan don shwa tang ka OPD hynrei yn sa nang plie suki suki ia kiwei kiwei ki lad jingsumar naduh ka jingsumar ia ki jingpang bampong ne Cancer, ka Jingpang Klongsnam (Heat) bad kiwei kiwei ki jingsumar kiba katkum ka juk kaba mynta ha ryngkat ka jingiatreilang bad ki doktor specialist kiba la paw hapoh ki  jylla bapher  jong ka ri,” ong u Bah Hek.

Nalor kata u la ong ruh ba lyngba kane ka hospital ym tang kiba wan ban shah sumar hangne kin ioh ia ka jingmyntoi hynrei lyngba kane ka jaka ai jingsumar kan ai jingmyntoi bad jingkyrkhu ruh ia ki samla ha ka liang ka iohkam iohjam khamtam ki nongtrei kum ki Doctor, ki Nurse, ki Ward Boys, Ward Girls bad kiwei kiwei ki jingdonkam yn ailad shwa ia kiba na kane ka jylla bad ruh ia kito kiba na ki jylla jong ka thain North East katkum ki kyrdan pule ki jong ki.

U Bah Hek u la ai khublei kyrpang ruh ia baroh ki 12 ngut ki nongmihkhmat kiban peit ban khmih bad ban pyniaid ia kane ka hospital khamtam ka jingiadonlang ki Doctor Specialist kiba la rangbah bha ha ka kam sumar pang khnang ba kan lah ban pynkot ia ka jingthmu kaba bha lyngba kane ka hospital bad u kyrmen ruh ba lyngba kane ka jaka sumar ki paidbah nongshong shnong ka jylla bad kiwei kiwei ki jylla kin ioh shisha ia ka jingmyntoi kaba khraw.

Ha kane ka sngi plie la ia don lang ruh u Parish Priest ka Byrnihat Parish uba la shim ia ka bynta ban kyrkhu kyrdoh ia kane ka jaka sumar ka ban long ka jingkyrkhu bad jingmyntoi kaba khraw ia ki paidbah ki ban sa ioh ia ki lad jingsumar.