Plie tnad treikam ka Seiñ Kur Dkhar Jaintia Hills ha Wapung

Syllad | The Rising MeghalayaJuly 7, 2019

JOWAI: Ka shnong Wapung, kawei na ki shnong ha Jaintia Hills kaba bun bha ki jaid Kur Dkhar kala ioh iaka tnad trei kam jong Ka Seiñ Kur Dkhar Jaintia Hills kaba tip kum ka Seiñ Kur Dkhar Jaintia Hills, Wapung Circle.

Ïa kane ka seng kur jong ka Wapung Circle la thaw bad pynskhem haka sngi Saitjaiñ ha Community Hall jong ka shnong Wapungshnong, East Jaiñtia Hills hapoh ka jingialam u KB Dkhar, President bad u Hamjhan Dkhar General Secretary jong ka ha ryngkat bad ka jingiadonlang ki nongialam jong ka Seiñ Kur Dkhar Jaintia Hills, East Zone, u Libas Dkhar, President bad u Pdianghun Dkhar General Secretary.

Ki shnong kiba hap haka Seiñ Kur Dkhar Jaintia Hills, Wapung Circle, ki long, Wapungskur, Wapungshnong, Pamrakmai, Pamra Paithlu, Mookhep, Jalyiah, Khliehmyntriang, Iongkaluh, Iurim Khliehshnong, Sohkymphor, Byrwai bad Rashai lah ruh ban kynthup sa ia ka Tuberkmai Shnong bad Shohshrieh lada donkam.

La pynphuh pynphieng shuh shuh ia katei ka sngi, da ki rwai ieit kur bad jingshad tynrai da ki khun samla jong ka Kur Dkhar kiba hap hapoh jong katei ka Circle.

Ha katei ka jingthung pynskhem ia ka tei ka tnad trei kam jong ka Kur Dkhar Jaintia Hills, la ioh ia ki jingkren kyntu kynpham na ki nongialam bapher bapher jong ka Seiñ Kur Dkhar Jaintia Hills ki ba kynthup naduh Central Body bad East Zone, kata u K.B Dkhar bad Hamjhan Dkhar, Pdianghun Dkhar bad kiwei kiwei halor ka phang, kumno ban trei shitom ban tehsong ia ka jingia ithuh ithaw, jingiaieit iajan, jingiarap ba mar kylliang shikur shijait bad ruh kumno ban tehsong ia ka jinglong kawei ka doh kawei ka snam jong ka Kur Dkhar khnang ban lait na kino kino ki jingiashong kha sang para Kur Dkhar hadien ha bud bad ruh halor kiwei kiwei de ki phang na ka bynta ka bha ka miat jong ka Kur Dkhar bad wat ka Jaidbynriew hi.

Ki Nongkit Kam ba nynkong jong ka “Seiñ Kur Dkhar Jaintia Hills, Wapung Circle”. Ki long, President Shaniahskhem Dkhar, Vice President U Chawas Dkhar bad u Market Dkhar General Secretary, Kyrshanbha Dkhar Assistant. General Secretary, u Francis Dkhar bad u Shngainlang Dkhar, Finance Secretary u Binis Dkhar, Treasurer ka Rosa Dkhar; Adviser, u M H Dkhar bad u Emmon Dkhar lem bad sa 15 ngut ki dkhot sha ka Executive Committee.

La pynbam smai ïaki nongkitkam ka Seiñ Kur Dkhar Jaintia Hills, Wapung Circle da u President jong Seiñ Kur Dkhar Jaintia Hills Central Body u KB Dkhar, katba ia ki dkhot jong ka Executive Committee pat la pynbam smai da u General Secretary jong ka Seiñ Kur Dkhar u Hamjhan Dkhar.