Plie paidbah u DC, EWKH ia ki sem die dohkha ha Mairang

Syllad | The Rising MeghalayaMarch 22, 2023

U Deputy Commissioner ka Eastern West Khasi Hills District, Mairang, u Bah W. Nongsiej ula plie paidbah ia ki artylli ki sem die dohkha ia kiba la bei tyngka lyngba ka skhim jong ka sorkar pdeng kaba la ai kyrteng ka “Blue Revolution 2018-19” haka sngi Balang.

Iaka jingialang plie kaba la pynlong da ka ophis jong ka Fishery Officer, Eastern West Khasi Hills District, Mairang ha Iew Langstieh, Mairang

La iadonlang u Syiem ka Hima Nongkhlaw, u Pa’iem P.M Syiemlieh, ki Myntri jong ka  Hima, ki nongialam shnong, u Superintendent of Fisheries ka West Khasi Hills District, u Bah E.R Laloo, i Fishery Officer ka Eastern West Khasi Hills District, i Kong J.L. Nonglait, ki nongri dohkha ka thain bad kiwei kiwei.

U Deputy Commissioner ka Eastern West Khasi Hills District, Mairang, U Bah W. Nongsiej u la ong ba ia kane ka projek, kaba la pyntreikam da ka tnat ri dohkha ka jylla lyngba ka skhim “Blue Revolution”, la pyndep ha ka jinglut kaba 10 lak tyngka  kawei ka sem die dohkha, na kaba, 6 lak la bei tyngka lyngba ka subsidi katba 4 lak pat la bei tyngka da ki nongiohbhah na ka skhim. U la ong shuh shuh ba lyngba kane ka projek, nalor ka jingtei ia ki sem die dohkha, ki nongiohbhah ki ioh ruh ia ki mashin kiba kynthup ia ki refrigerator bad ki tiar ba ju pyndonkam ha kaba ot dohkha kum ki wait, ki dieng shaindoh bad kiwei de.

U Bah Nongsiej u la ong ruh ba ka jingplie paidbah ia kane ka projek ha kane ka sngi kan plielad ruh ia kiwei pat ki nongri bad nongdie dohkha ba kin kyntiew shuhshuh ia ka kam ri bad die dohkha ka jongki ha ki sngi ki ban wan lyngba ka jingkyntiew ia ka jingdon jong ki nongiohbhah na kane ka skhim da ka tnat ri dohkha ka jylla.

Kiwei kiwei pat kiba la ai jingkren ha kane ka jingialang ki kynthup ia u Syiem ka Hima Nongkhlaw, u Pa’iem P.M Syiemlieh, u Syiem Khynnah jong ka  Hima, u Pa’iem K.M Syiemlieh bad i Fishery Officer ka Eastern West Khasi Hills District, i Kong J.L. Nonglait. (SDPRO, Mairang)