Plie ka MCSWA ia ka jaka shong kyrpang na ka bynta ki riewtymmen ha Jowai

Syllad | The Rising MeghalayaDecember 16, 2023

Ka Mihmyntdu Community Social Welfare Association (MCSWA) ka la jam sha uwei pat u mawjam ha ki jingtreikam ki jong ka haka 15 tarik Nohprah lyngba ka jingplie ia ka jaka shong kyrpang na ka bynta ki riewtymmen ne Drop in Centre For Senior Citizens ha ka shnong Moosalyngkat, Jowai.

Ha kane ka prokram la ia don lang ka Kong DV Lyngdoh, Additional Deputy Commissioner, West Jaintia Hills kum ka Kongsan bad ka Kong Ripaya Passah, District Social Welfare Officer West Jaintia Hills kum ka Symbud Kongsan.

Ha ka jingkren ka Kong Lyngdoh ka la pynpaw halor ka jingdonkam ban shim ia kiba kum kine ki sienjam, kata ban pynioh ia ki jaka ba kyrpang na ka bynta ki riewtymmen  kiba la noh rta ba kin ia don bynta ha ka imlang ka sahlang, ban pynmyllen ha ki jingleh jingkam bad bunjait bad ruh ban ioh ia ka jingkyrshan lem.

Katba na ka liang ka Kong Passah ka la pyrto ia ka sienjam ba la shim da ka MCSWA ka ban plielad shibun na ka bynta ka bha ka miat jong ki riewtymmen lyngba kane ka lynti ai jingkyrshan ka ban long da shisha ka jingkyrkhu kaba khraw na ka bynta kiba kum kine ki briew hapoh ka imlang ka sahlang.

Kumjuh na ka liang ka Dr JN Shullai kala pyrto ia baroh ki kynhun kiba iadei bynta bad ka MCSWA halor ka jingkut jingmut ban bteng ban aijingshakri ia ka imlang ka sahlang bad ban pynthikna ba kane ka centre kan long da shisha ka rynsan kaba kmen bad aimynsiem na ka bynta ki riewtymmen.

Shuh shuh ha kane ka prokram la sakhi ruh ia mynsiem aijingkyrshan kaba da ka jingieit na ka liang ki riew rangbah bad ki nongshong shnong jong ka thain, kata ha kaba yn sakhi ruh ia ka lawei jong kane ka centre kum ka jaka ha kaba yn iasam ia ki khana, ki jingiarkhie iakmen bad ka jingiateh.

“Kane ka centre na ka bynta ki riewtymmen kan long ruh ka jaka ha kaba yn aijingkyrshan ban sumar sukher bad ban khmih na ka bynta ka bha ka miat bad ka jingkmen hapdeng ki dkhot nongshong shnong ka thain kiba la tymmen.

La plie ia kane ka centre hapdeng ka jingiakmen ia risa ha ryngkat ka jingiadon lang  ki riew tymmen ba pawkhmat jong ka thain, ki nongmihkhmat na ka Synjuk Ki Waheh Chnong Jowai bad kiwei kiwei.