Plie ka Kong Isawanda iaka CM Inter School Athletic Meet ha Shillong

Syllad | The Rising MeghalayaJune 1, 2023

Ka State Level Inter School Athletic Meet kaba lai sngi ba la pynlong ia ka da ka tnat Directorate of Sports & Youth Affairs ka sorkar jylla, ka la sdang naduh haka sngi Balang ha ka shlem ai jinghikai ki kam ialehkai ka jylla, katta ha SAI, STC, NEHU, Mawkynroh.

Kongsan ba la wan ban plie ia kane ka lympung dei Ka Kong Isawanda Laloo (IAS) Director of Sports & Youth Affairs ka sorkar jylla bad u symbud kongsan dei u Working President ka Meghalaya State Olympic Association u bah John F. Kharshiing.

Kane ka lympung ialehkai kaba lai sngi kan kut ha ka 2 tarik u Jylliew, bad ki khynnah skul ba la poi ban iashim bynta na baroh ki 12 tylli ki district ka jylla ki long 850 ngut.

Haba kren kum ka kongsan, na ka liang kong Isawanda, ka la pynpaw ba ka jinglah ban pynlong ia kane ka lympung bah, ka jia long hadien ba ha ki ar bnai kiba la dep, ka tnat sports lyngba ka ophis jong ki District Sports Officer (DSO) ka la lah ha kaban pynlong shwa ia ka District Level Chief Minister Inter School Athletic Meet bad ki khynnah ba la wan poi mynta haka nongbah, kidei tang kito kiba la lah ban paw ba ki da long shisha kiba kynsai na kiba kynsai tam bad kiba dei hok shisha ban ioh pat  sa ia kum kane ka lad bad ka kabu ksiar ban ioh iashim buynta ha kane ka lympung mynta ka kynti.

Hynrei lada shim kyllum ha shwa ban pynlong ia kane ka lympung ha nongbah, ki khynnah baroh kiba la iashim bynta ha la ki jong ki district ki jong ki, kim duna ia ka 12 hajar ngut.

Shuh shuh kong Isawanda I la pynpaw ba ka daw ba la lum biang sa shisien ia ki khynnah ialehkai hangne hya ka nongbah ka long ban lap bad ban shem shuh shuh sa mano pat napdeng ki nongwan iashim bynta kiba shim ia ka bynta kum ki nongialehkai ba kynsai na kiba kynsai tam, da ka jingkyrmen ba ha kine ki lai sngi,  baroh kiba wan ban iashim bynta kin da lah  ruh ban pynpra ne ban thaw  ia ki rekod ba thymmai jong kane ka lympung iakob.

Ha kane ka sngi kaba sdang la lah ha kaban pyndep ia kiba bun tylli ki heats kiba dei naka bynta ka track bad ka field bad la don ruh ki kato katne tylli ki final.