Plie ka jingkhang iaki Karbi ban kren iasuk wat la ki thang iaki trep haki jaka rep: Dorbar Shnong Khanduli

Syllad | The Rising MeghalayaMay 13, 2023

Ka jingkhang ka plie ban iakren iasuk hapdeng ki jaidbynriew Karbi bad ki Pnar ba shong basah ka Khanduli wat hadien ba kila thang haduh 3 tylli ki trep buh kba ha jaka rep ha Khanduli.

Ia kane la pynbna da u Waheh Shnong Khanduli ma Yooshida Nongspung haka jingialang kaba long ha ka sngi Thohdieng kaba la wan ban iashimbynta da ki spah ngut ki nongshong shnong bad ki nongialam shnong na ki shnong ba marjan ba kynthup iaka Lapangap, Umplu, Namdong, Umshangiar bad kiwei nalor ki sengbhalang ba kynthup iaka Khasi Students’ Union bad ka Federation of Khasi Jaintia and Garo People (FKJGP).

Wat hadien ka jingthang iaki 2 tylli iing trep haka sngi Palei bad kala mih ka iasyndonkti bad iashoh iadat hapdeng ki Pnar bad Karbi bad mynsaw u wei u Karbi, haka sngi Thohdieng ki Karbi kila thang biang sa kawei ka iing trep hajan ka lum jingtep ka balang Presbyterian bad marpyrshah ka ktem pulit Assam.

Ka Khanduli wat hadien kine ki jingjia kala pynbna ba ka jingkhang ka plie iaki paid Karbi ban poi sha ka miej jong ka jingkren iasuk.

Kumban shu pynkynmaw ha sngi Palei, ki paidbhur naka jaidbynriew Karbi kila lun maw iaka kali u SP West Jaintia Hills District u Ma C Syrti hadien ba uwei u Karbi u la mynsaw ha ka jingshah shoh ha ki nongshong shnong ka Khanduli hadien ba phra ngut ki Karbi ki la thang ia artylli ki iingtrep jong ki nong Khanduli haka lyngkha ha madan Khanduli bad ki nong Karbi ki la byrngem byrsit ia uwei u nong Khanduli.

U syllad.com uba la hiar sha Khanduli haka sngi Thohdieng, katba dang iaid ka jingialang kaba iadonlang u Deputy Commissioner, West Jaintia Hills u Bah BS Sohliya bad u Ma Syrti bad ki nongialam shnong Khanduli haka por kumba 3 baje nohphaisngi la ioh iaka khubor ba ba ki nong Karbi ki la thang sa ia kawei iing trep ha ka lyngka ba don hajan ka lumjingtep ka balang Presbyterian bad pyrshah ka ktem pulit Assam.

Kumta paidbah na Khanduli da ki spah ngut ki la thmu ban leit hiar sha katei ka jaka, hynrei nakaliang u DC bad u SP lem bad ki pulit ki khanglad khang lynti bad kyntu iaki ban tur sha ka jaka ba don ki paid Karbi khnang ban lait na kino kino jingjia sngewsih.

Shuwa kane ka jingshah thang kane ka iing trep, ki nong Khanduli kila dep shong ia ka jingialang paidbah bala pynlong da ka Dorbar Shnong Khanduli ha Madan Phutbol Khanduli.

Ha katei ka jingialang la ioh ia ki jingkren na ki waheh chnong jong ka Umshangiar, ka Lapangap, ka Umplu, ka Namdong B, ka Saitsama bad na ka seng KSU kiba la ai ia ka jingkyrshan ia ka shnong Khanduli.

Ka jingialang ka la shim ia la rai katba ki nong Karbi kim pdiang ia ka jingtyrwa jingsuk noh ki dang bteng ia ka jingkhang ia ka rung ka mih ki nong Karbi sha Khanduli bad ka iadie iathied bad ki Karbi. Shuh shuh la rai ba ki shnong kiba marjan marpa ia ka Khanduli kin sangeh shwa ia ka iadie iathied bad ki nong Karbi.