Plie ïaka jingrakhe dap 25 snem ka Jowai District Presbyterian School

Syllad | The Rising MeghalayaMarch 7, 2019

JOWAI: U Moderator Khasi Jaintia Presbyterian Synod Mihngi, Pastor LS Pohkshang ula plie pyrda ïaka jingrakhe dap 25 snem ka jingïaid lynti jong ka skul Jowai District Presbyterian School (JDPS), haka shnong Ialong, West Jaiñtia Hills District haka sngi Palei.

U Pator Pohkshang ula plie ruh ïa u maw sah jingkynmaw ka skul haka jingïadonlang ki Pastor, ki Tymmen Basan na ki Balang bapher bapher ryngkat ki nonghikai bad khynnah skul.

U Pastor BB Lamin ula pynïaid ïaka jingïalang bad ka Headmistress Jowai District Presbyterian School (JDPS) ka Kong R Bamon kala ïathuh ïaka history lyngkot ka skul.

Ïa kane ka skul la seng naduh u snem 1994 ha nongbah Jowai, da ki san tylli ki Balang kiba kynthup ïa ka Balang Jowai, Thadlaboh, Khimusniang, Mulang bad Mihmyntdu.

La sdang ïa kane ka skul naka ïing shongwai ha Chutwakhu, Jowai bad u snem 2000 kyntiew kyrdan shaka Class V. Namar ka jingduna ka jingrung klas ki khynnah wat hadien bala sdang ïaka klas X, ha u snem 2007 la hap ban pynsangeh shuwa shipor.

Ha u snem 2012 ka bor pynïaid ka skul kala ïoh ka jaka kaba 30 hajar square feet ka jaka bad lyngba ka Fund Raising Sub Committee kala ioh jingiarap T.20,02,500 lak na SSA Skhim ban shna ïaka iing skul ha Ialong. Ha u snem 2016 la pynkynriah iaka skul bad la wan plie ïaka ïing thymmai da u Dr. RC. Laloo Symbud Myntri Rangbah barim ka jylla ha u snem 2017.

U Pastor LS Pohkshang, ula ong ba ha kano kano ka lyngkha trei ka Balang, ka jingeh ba hakhmat eh ka dei ka pisa (Fund), hynrei kane kam dei ka jingeh balah ban khanglad lada ngi don ka jingaiti, ka jingngeit bad ka mon ban trei ïa ka kam. U la ong ruh ba ki nonghikai ne ki nongtrei mission ki dei ban aiti met bad mynsiem ban ai ka jingshakri kaba pura.

“Ki nonghikai ki dei ban don ka jingïadei kaba iajan bad ki khynnah skul kumjuh ki kmie ki kpa jong ki bad haba sam ïaka jingnang jingstad dei ban ïabeh katkum ka juk ban saiñdur janai ïaka lawei ki khynnah skul”, la ong u Pastor.