Phuh phieng ka Chad Sukra Jowai, ka tamasa shuwa ban bet kala wanrah ruh ia u slap ban pynjem iaka jingshit ka mariang

Syllad | The Rising MeghalayaApril 24, 2023

Ka Chad Sukra ka Jowai kaba ar sngi kaba pynlong da ka Seinraij Jowai kala poi sha kaba kut hapdeng ka jingiphuh iphieng bad shongshit haka Sngi U Blei.

Ka Chad Sukra ka dei ka tamasa kaba la pynlong manla u snem shuwa ban bet ia u symbai sha ki hali ki pynthor, hynrei mynta ka kynti kala wanrah ryngkat ia u slap ban pynjem iaka jingsyaid ka suinbneng.

Kane ka tamasa dei ruh ban pdiang iaka aiom Pyrem kaba ki nongrep kin hiar sha ki lyngkha ban rep ban riang hadien bala kut ka aiom Tlang ne ka aiom tyrkhong.

U Comingone Ymbon, Myntri ka tnad Food Civil Supplies & Consumer Affairs Department bad kiwei ula wan sakhi kum kongsan ha kaba prorkam ha Iawmusiang kaba la tip kum ka “Mih Iaw”. Ula ong “Uwei uwei na ngi, ngi dei ban tynrong halade iaka jingkitkhlieh ban long ki volunteer ban tyngkai iaka mariang.”

“Haba peit iaka jinglong jingman ka sawdong sawkun ka mariang ka pyndiaw ia u namar ba u briew ula pynjot pathar iaki lum ki wah kala wanrah iaka jingtyrkhong ki um ki wah,” la ong u ma Comingone.

Ula ong shuh shuh “Haka por tlang to ngin long ki volunteer ban pynduh pyndam iaka jingthang lum kaba ktah bha iaka sawdong sawkun ka mariang. Phi la sakhi ba ha kine ki shitaiew kala kiew bha ka jingshit ka pyrthei ne ka Global Warming bad wt ha kane ka thain jong ngi ruh ngi la sakhi iaka jingshit bad kane ka jingjur ka jingshit kaba nyngkong tam kan wanrah iaka jingtyrkhong um.”

Kumta ula ban jur ia uwei pa uwei ban iada iaki khlaw ki btap ban tyngkai iaka jingbuh jingsat ka mariang.

Shuwa kane haka prokram haka por mynstep, u Wailadmiki Shylla MLA Jowai ula long kum u kongsan ha Mynkoipyrdi Iongpiah. La iadonlang ruh u Hammarsing Kharmar secretary cultural committee jong ka Seng Khasi Kmie kum u nongshah khot sngewbha ba kyrpang haka prokram pynbyrngia haka por mynmiet ha Iongpiah kaba la tip kum ka Shad Kper Syntu bad la pynshongshit ia kane prorkam da ka jingsur jingtem ka kynhun tem Snap Paka.

U president ka Seinraij Jowai u OR Shallam, ula iathuh ba iaka Chad Sukra la pynkhie im ïaka ha u bnai Nohprah jong u snem 2005 hadien ba ka la duh la dam la kumba 50 snem bad mynta ka jingïaid lynti kala kynjoh 18 snem. Lyngba kane ka tamasa kala plie lad lynti ia bun ngut ki nongthaw jingrwai bad nongshad ban pynpaw iaka sap ka phong kaba nylla jong ki.

Ki khun Niamtre naduh ki khynnah, samla shynrang bad kynthei kumjuh ki longkmie longkpa na ki shnong bapher kynthup iaka Iawmusiang, Seintyllilang Ladthadlaboh, Ummulong, Seinraij Shillong, Loompyrdi Ïongpiah, Loomkyrwiang, Dulong, Loomīongkjam, Tpep Pale, Seinraij Raliang, Umshangiar, Chilliangraij, Panaliar nalor ki sengsamla ka Khynroo Khyllood Committee ka Seinraij Jowai kila shimbynta shitrhem ha kane ka tamasa.