Phla ki nong Bangladesh ba siew T.1000-T.2000 sha ki dalal ban ioh rungtuh; ioh bat ka JNC na East Jaintia Hills

Syllad | The Rising MeghalayaApril 23, 2025

Ka Jaintia National Council (JNC) haka sngi Balang ka la ioh ban bat noh ia san ngut ki suba nong Bangladesh na East Jaintia Hills hadien ba la kynnoh ba ki la wan rung beain sha India khlem ki kot ki sla kiba biang.

Ka jingioh bat ia kine ki briew ka la wan long hadien ba ka JNC hapoh ka jingialam jong u Bah Ency Shadap, Chairman ka Employment Commission ha ki bynta jong ka surok bah National Highway-6.

“Haba pynlong ia ka jingtohkit, kine ki suba nong Bangladesh ki la phla ba ki la wan rung sha kane ka ri lyngba ki nongiarap kiba dei ki trai shnong kiba long kum ki dalal bad kiba la oh dor hapdeng T.1000 bad T.2000 marwei. Ka jingthmu ka jong ki ka long ban wad jingtrei bylla hapoh ki karkhana dewbilat ha ka thain Umpleng, East Jaintia Hills,” ong u Bah Shadap.

Hadien kane ka JNC ka la aiti noh ia ki sha u heh ka tnad infiltration ha Umtyra, East Jaintia Hills, ban leh shuh shuh ia kaba donkam da kaba kyntu ruh ban tohkit bniah halor kane ka phang. Na ka liang ki ophisar ruh kin leh ia kaba donkam kynthup ka jingmudui suo moto case pyrshah ia ki briew kiba donkti, u la ong.

Une u nongialam ka JNC u la kynthoh jur ia ki shipai BSF halor ka jingbym shimkhia  ha kaba iadei bad kane ka mat kaba la plielad ia kiba kum kine ki jingwan rungtuh lyngba ki jaka khappud jong ka ri.

Ka JNC ka pynrem jur ruh ia kine ki dalal kiba tang na ka bynta khyndiat eh ka pisa kim shym la khein shuh ia ka imlang ka sahlang bad ia ki hok jong ka, da kaba kular ruh ban leh da kaba tyngeh lada lap ia kiba kum kine ki briew.

U Bah Shadap u la ban jur ruh ba ka jingthaw jong ka seng ia ka Employment Commission ka thmu ban thaw ia ki lad ioh kam ioh jam na ka bynta ki samla ka thain, da kaba pynapw ruh ka jingsngew bynniaw ba don ki dkhot nongshong shnong kiba kloi ban iarap ban ai kam aijam ia ki briew kiba na bar da kaba buh ruh ia ka jingkylli ha kaba iadei bad ka lawei jong ki samla trai shnong lada kiba kum kine ki jingleh ki dang iai bteng.

Ha kajuh ka por ka seng JNC ka maham tyngeh ia kito ki briew kiba ai kam ai jam ia ki briew kiba na bar, da kaba kyntu ia ki ba ki dei ban pyrkhat biang ia kiba kum kine ki jingleh shwa ban dier ka por.

Ka JNC ka la kynnoh ruh ba bun bah ki briew na Bangladesh kiba shong ba sah ha ka thain Umpleng, Soo Kilo, bad Ladrymbai, East Jaintia Hills bad ong ba shen kan sa leh ia kaba donkam halor kane ka phang.