Phah tohkit u DC ba jur ka jingtih beain ia ki lum ki wah ha ka thain Byrnihat-Khanapara

Syllad | The Rising MeghalayaMay 13, 2024

Hadien ba la ioh ia ka jingujor na kiba bun balang halor ka jingtih khyndew beaiñ da ki katto katne ngut ki riew shimet ki bym lah ban tip, na ka liang u Deputy Commissioner ka Ribhoi District, u Arpit Uphadhyaya u la pynbna paidbah ba na ka liang ki bor pynïaid district ki la shim khia da kaba bthah ïa uwei na ki Magistor ka District ban pynlong ka jingwad bniah bad jingtohkit halor katei ka jingujor halor ki jingtih beaiñ ïa ki lum ki wah naduh ka thain Byrnihat ter ter shaduh Khanapara.

Haba kren sha ki lad pathai khubor hynne ka sngi Nyngkong, u Deputy Commissioner u la ïathuh ba ka la don shisha ka jingujor na kiba bun balang halor kane ka kam tih khyndew bad pynmadan ïa ki lum ki wah khlem ka jingtip ne ïoh jingbit na ki bor pyniaid District.

Kumta u la ong ki bor ka district ki la sdang ban tohkit bniah ia kane ka kam beaiñ da kaba thung ïa u Magistor bad kumjuh ruh la thaw da kawei ka committee ban pynlong ia ka jingtohkit bad la dep ruh ban ai ka jingbthah ia ka Tnat territorial forests lyngba u DFO ban ai ia ka kaiphod halor ka jingdon kane ka kam tih beaiñ ïa ki lum ki wah.