Phah pyndam ka Elaka Nongjngi iaka jingpynbna, phah ujor u CEM JHADC sha iingbishar

Syllad | The Rising MeghalayaOctober 19, 2020

U Dolloi ka Elaka Nongjngi u ma Copiousness Daw ula pynpaw ka jingpyrshah kaba jur halor ka jingpynbna jong ka Jaintia Hills Autonomous District Council (JHADC) baka shnong Thadmynri ka hap hapoh ka Elaka Nartiang.

“Ka Elaka Nongjngi baroh kawei ka pyrshah jur ia kane rai bad ka jingpynbna jong ka konsil ha kaba nakaliang ka elaka ngi dawa naka konsil ban pyndam ia kane ka jingpynbna namar ba kane ka shnong ka hap hapoh ka elaka naduh bala seng shnong iaka Thadmynri,” la ong u Dolloi Elaka u ma Daw hadien ka jingwan iakren bad u Chief Executive Member (CEM) jong ka JHADC u ma Thombor Shiwat haka sngi Nyngkong.

“Ka Shnong Thadmynri ka hap hapoh ka Elaka Nongjngi naduh ka kam thung Waheh Shnong ruh la thung daka Elaka Nongjngi bad nga kyntu iaka Executive Committee ka JHADC ban pynbeit ia kane kam ban lait mih jingeh hadien habud,” ong u Dolloi.

Ka JHADC kala pynmih iaka jingpynbna haka 7 tarik une u bnai ka shithi NO.JHADC/POL/33/2014/20 bad kane ka jingpynbna ka ong baka Executive Committee Jaintia Hills Autonomous District council Jowai hadien ba la bishar bniah ia ki kot ki sla ki ba iadei bad u pud u sam jong ka shnong Thadmynri la shem ba ka shnong Thadmynri ka hap hapoh u pud sam jong ka Elaka Nartiang.

 “Ka Executive Committee Jaintia Hills Autonomous District Council Jowai ka la rai ba naduh ba pynmih ia kane ka jingpynbna ka Shnong Thadmynri kan hap hapoh ka jingpeit jong u Dolloi ka Elaka Nartiang,” la ong ka jingpynbna.

Pynbna ka JHADC ba ka shnong Thadmynri ka hap ha Elaka Nartiang

Halor kane ka jingpynbna u Dolloi Nongjngi, ka Raij Namdong ha ryngkat bad u MDC ka Khanduli Mynsngat u ma Dawan Lyngdoh kiba iakynduh ia u CEM JHADC ma Thombor Shiwat ban pynpaw ka jingpyrshah bad sngewlyngngoh halor ka jingpynbna ka JHADC.

“U CEM ula kren shai iaki ba um lah shuh ban leh eiei halor kane ka kam bad lada ki don jingpyrshah ki lah ban ujor sha ka iingbishar halor kane ka kam,” la ong u MDC ka Mynsngat bad ki nongialam rai bad elaka Nongjngi.

U waheh Raij Namdong, Ma Elias Susngi ula ong ba shnong Thadmynri ka hap hapoh ka shnong Namdong. Naduh u snem 1970 bad ka shnong kala jop mukotduma haka por baka ka konsil ka dang hap haka United Khasi Jaintia. Ka shnong Thadmynri kadei ka khlaw bad kadei ka shnong Namdong kaba ai jaka iaki nongshong shnong ban seng shnong.

“Ula buh jingkylli ruh ia u CEM ki kot ki sla aiu baka konsil ka don bad pynthikna ba ka Thadmynri ka hap hapoh ka Elaka Nartiang,” la ong Elias bad dawa ban weng mardor iaka jingpynbna ba ka Thadmynri ka hap haka elaka Nartiang.