Pdiang ka kong Bindas Syiem iaka jingkular ka sorkar, weng iaka jingiakhih shah thngan

Syllad | The Rising MeghalayaJune 11, 2024

Hadien hynriew sngi ka jingshong shah thngan, ka Kong Bindas Syiem kala weng noh iaka jingiakhih jong ka haka 11 tarik Jylliew hadien ba ka sorkar kala kular ban shna iaka surok Nongpoh Umden Sonapur.

Ka kong Bindas kala sdang iaka jingiakhih shah thngan jong ka naduh 6 tarik une u bnai.

Kane ka jingweng shong shah thngan ka kong Bindas Syiem kala wan jia long hadien ka jingkular u symbud Myntri Rangbah Bah Prestone Tynsong ban shimkhia ban pynioh pisa na ka sorkar pdeng ban shna iaka surok na Nongpoh Umden haduh Sonapur.

U Bah Prestone ula kular ruh ban shna iaka surok na Umden Lum Nongrim ban pynsiasoh iaka surok bah NH 6 ha Byrnihat. Ka jinglut ban shna ia kine ki surok kan kot haduh kumba 100 klur lyngba ka DoNER bad ka PMGSY jong ka bynta kaba III kaba pyntrei ha Jylla

Shuwa kane ka kong Bindas Syiem kala iakynduh ruh ia u Bah Prestone Tynsong shuwa ba kan weng iaka jingiakhih shah thngan. La synranlang iaka da ki nongialam ka HYC, HITO bad kiwei ki seng.

Ka Kong Bindas Syiem, kala ong ruh ba kala ioh iaka jingkular kaba biang bad na kaliang sorkar ban shna ia ka surok, kumta kala pyntip ba kala weng iaka jingiakhih jong ka.