Pawkhmat ki barikor ka Jylla haka lympung thohdur ha Santiniketan, West Bengal

Syllad | The Rising MeghalayaFebruary 24, 2025

Ka lympung thohdur ki barikor ba la tip da ka Ramkinker Baij Memorial Art Camp la pynlong ha Prakriti Bhavan, Santiniketan, West Bengal naduh 16tarik haduh 21tarik Rymphang, 2025.

Kane ka Lympung Thohdur ka dei ka rong ka taw ban ia sam jingtip bad ñiewkor markylliang ia ki deiriti bapher ha Ri India ba la pynbeit da ka Santiniketan Kala Bhavan Praktoni bad Riti Academy of Visual Arts, Shillong.

Ha u bnai Nohprah 2023, la pynlong ia ka Thoh Shun Art Camp ba la pynbit pynbiang da ka Riti Academy ha NEHU Salonsari, Shillong bad mynta ka kynti ka Santiniketan Kala Bhavan Praktoni ka la pynbiang ban wer khatsaw ngut ki barikor ka Riti Academy na Shillong ban shim bynta ha ka Ramkinker Baij Memorial Art Camp.

U kongsan ha kane ka rong ka taw thohdur, u Dr Asok Das, u barikor ba pawnam ha Ri India bad Director ba mynshwa jong ka Jaipur City Palace Museum ha ryngkat ka Kiran Thaker, ka nongstahdur ba pawnam bad ka samla ba la shah hikai ha u Ramkinker Baij ki la iadon ryngkat bad u Dr Janak Jhankar Narzari bad u Bah Raphael Warjri.

Ha ka jingkren jong u kongsan u la kynthoh halor ka rukom pyniaid ia ki lympung treilang ki barikor ha ka thohdur ka ba la iai kylla dur na kawei ka phew snem sha kawei pat na ka daw ka jingsan stet bad kiew irat ka stadtip katkum ka juk. U la iaroh ia ki nonghikai jong ka Kala Bhavan, Viswa Bharati University ka ba dei ka salonsari ba pawnam tam ha Ri India ba ki kloi ban ia treilang bad ki samla pule thohdur jong ka jylla Meghalaya. U la ban jur halor ka jingdonkam ban pynsngew ia ki shnat sorkar ki ba dei ban tei ia ka kam thohdur, khnang ba ka thohdur kan long ka ba iai phuh iai phieng manla ka por. Ha ka kylla step la pynwai da ka ba ki kynrem lyndan ki la pyllait ia ka kot ba ai kyrteng KOT Khasi Old Testament ba la thoh da u Bah Raphael Warjri, ka ba dei shaphang ki khanatang bad puriskam Khasi da ka ktien phareng ba la bynrap ruh da ka phawar ha ka ktien Khasi.

Ka Synjuk ki barikor Khasi, Riti Academy ka la jied khatar ngut ki barikor na jylla Meghalaya bad arngut na jylla Assam, kata u Manoj Roy bad ka Paran Banti Devi.

Ki barikor na jylla Meghalaya ki kynthup ia u Bah Raphael Warjri, Imogen Wahlang, Pringsrang W Sangma, Rickyshi Suiam, Baniarjingmut Lyngdoh Mawphlang, Clive Steven Kharphuli, kynthup ruh ia ki samla pule na jylla ki ba dang pule ha Kala Bhavan ba kynthup ia u Wanhi-I Challam, Rekilbert Lyngdoh Mairang, Fredrick Edgar Warjri, Joanna Nongbri, bad Ibaiamonlang Brigettte Marngar. Ki barikor na Santiniketan ki long u Amit Kumar Dhara, Jaya Boro, Ketaki Roy Choudhury, Manoj Kumar Prajapati, Tamina Bhattacharya, Archana Das, Mati Lal Kalai, Prabir Biswas, Riya Guha Roy, Bisewajit Das, Koeli Mukherji Ghosh, Krishna Kali David, Srabani Bhattacharya, Anand Ghose, Saday Alo Choudhury, Asit Bose, Nandadular Mukherjee, Sisir Sahana, Sunanda Sanyal, bad ka Rita Ghose.

Kane ka long ka sien ka ba nyngkong ba ka kynhun na jylla Meghalaya ka la ioh bynta ban iatrei lang ha Santiniketan ha kaba ka Riti Academy of Visual Arts ryngkat ka Santiniketan Kala Bhavan Praktony ki la iatrei lang ban pynlong ia kane ka lympung thohdur ha Santiniketan.

Baroh ki barikor na jylla Meghalaya bad na Santiniketan ki la ia trei shitrhem baroh shi sngi manla ka sngi bad ha ka por janmiet pat la pynlong ka rawai ka siaw ka put ka tem da ki dhulia bad kaitor na Santiniketan kynthup ruh ia ka ba pyninam ryngkat ka jingbatai shaphang ki durthoh jong iwei-pa-iwei na ki barikor.

Hynrei ka ba kham kynsai tam ka dei ka ba pyninam bad kren bniah halor ka jingim bad jingtrei jong u Ramkinker Baij ba la batai sani da u Dr Janak Jhankar Narzari, President ka Santiniketan Kala Bhavan Praktoni.

Ka jingkren ba la neh palat shikynta la iathuh bniah shaphang u Ramkinker Baij u ba la wan khmih ia ka nongbah Shillong ha u snem 1949, ha ka ba u la thohdur shibun tylli ki durthoh ba kynsai. Nangta la kren ruh shaphang ka jingim bad jingtrei jong u  Ramkinker Baij ba la batai tiak-pa-tiak da u Dr Narzari. Lait na kiwei kiwei ki jingrwai bad jingput jingtem na Santiniketan la rwai ‘phawer’ shaphang ka thohdur da ki barikor ba shimbynta ka ba la thaw da u nongialam Bah Raphael Warjri, ka ba la pynshongshit ia baroh ki paidbah ba la ia don lang.