Pan kaiphot ka MHRC na u DGP ba shah pyniap ki 3 ngut ha EGH, bad shah tait shnong ka longkmie ha WJH

Syllad | The Rising MeghalayaApril 18, 2024

Ka Meghalaya Human Rights Commission (MHRC) ha ka 18 tarik mynta u bnai ka la kyntu ia u  Director General of Police (DGP) ka Jylla ba un ai ia ka kaiphot halor ka jingjia shah pyniap dusmon jong ki laingut ki briew kiba dei na ka Jylla Assam ha ki bynta jong ka East Garo Hills District bad ruh halor ka jingjia shah tait shnong jong ka longkmie ha West Jaintia Hills District halor ka jingsuba nongaiksuid.

Na ka liang u Secretary ka MHRC u pyntip ba na ka liang ka MHRC ka la shim da ka ‘Suo Moto’ hadien ba ka la iohi lyngba ki lad pathai khubor ha ka 17 tarik mynta u bnai ha kaba iadei bad ka jingjia lap ia ki laitylli ki metiap ba la shah thang ingkhong jong ki laingut ki nongshong shnong ka Assam ia kiba la lap na ki bynta jong ka East Garo Hills district.

Ka Commission ka la kyntu ruh ia u DGP ka Jylla ba u dei ban aiti ia ka Action Taken Report (ATR), bad ia ka kaiphot kaba bniah hapoh ka shi bnai naduh ba ka la ioh pdiang ia kane ka hukum.

Kumjuh ruh u Secretary u pyntip ba ka MHRC ka la pan ruh ia ka kaiphod na ka sorkar ha kaba iadei bad ki jingmih khubor kaba iadei bad ka jingshah tait shnong jong kawei ka longkmie ha ka shnong Lumlakhiat, West Jaintia Hills halor ka jingsuba nongaiksuid ne ‘witchcraft.’

Halor kane ka Commission ka la ai ruh da ka jingpyntip sha u DGP ka Jylla ba un ai ia ka kaiphot kaba bniah halor kane ka jingjia hapoh jong ka 15 sngi.