Palat 500 ngut thep kyrteng ki samla sha ka elekshon ka MPYC ha ka Jylla

Syllad | The Rising MeghalayaNovember 27, 2024

Ki la don haduh palat 500 ngut ki samla kiba la phah ia ki kyrteng jong ki na ka bynta ban iakhun ia ka elekshon jied nongkitkam bapher bapher jong ka Indian Youth Congress ha Meghalaya.

U Election Coordinator ka Meghalaya Pradesh Youth Congress (MPYC) u Bah Banphira Basaiawmoit lyngba u kyrwoh u la ong, “Ha ka jingrakhe ia ka synshar paidbah kaba heh tam hapdeng ki samla jong ka ri, ka Indian Youth Congress ka la bteng ia ka jingkut jingmut ban pynlong ia ka elekshon kaba khuid ba shai na ka bynta ban jied ia ki nongkitkam jong ka Youth Congress ha Meghalaya.”

U la pyntip ruh ba ki samla ki la pyndep ia ka jingthep kyrteng na ka bynta ban jied ia ka kam State President, General Secretary bad kiwei kiwei ki nongkitkam ha ka Jylla. Nalor kane ka jingthep kyrteng na ka bynta ki district bapher bapher ruh ka la sdang.

“Ngi sngewkmen ban pynbna ba haduh palat 500 ngut ki samla ki la thep kyrteng na ka bynta ki kam bapher bapher kaba la kut noh ha ka 25 tarik Naiwieng lyngba ka Indian Youth Congress’s online registration system, kata lyngba ka “With IYC” app, ong u Bah Basaiawmoit.

“Ngi ai ka jingkhublei sha baroh ki samla kiba la iashim bynta ha kane ka kam. Ngi pynshlur shuh shuh ia ki samla ha kylleng ka jylla ban jied ia u State President lem bad kiwei kiwei ki President jong ki District da kaba pyndonkam da kane ka juh ka app. Ka tarik ba khatduh ban thep vote kan long ha ka 16 tarik u Nohprah 2024,” u la ong.