Palat 50 KM kyntur pud ka Assam, leh mynthi kawei hadien kawei ka sorkar: Bonney

Syllad | The Rising MeghalayaApril 9, 2019

JOWAI: U kyrtong shimet bad u heh Indian Forest Service (IFS) barim u Bah T HS Bonney ula ong ba mynta la 46 snem bala ïoh ka jylla kaba pura, hynrei kawei hadien kawei ka sorkar kala leh bymsuidniew ban pynbeit ïa u pud u sam ka jylla.

“Ka Assam mynta kala kyntur sha u pud u sam jong ka Meghalaya palat 50 kilometer, hynrei ym shym la leh eiei ban pynbeit ïa u pud u sam wat la ki paid Khasi-Pnar ba shong shnong ha khappud Assam Meghalaya na ka por sha ka por ki shah pyndik,” la ong u Bah Bonney uba wan hiar sha Jowai haka sngi Nyngkong ban pan ka jingkyrshan u paidbah ban kyrshan ïa u ha Stand War, Mynthong.

U la ther tyngeh ia ka party Congress kaba don ha ka bor ha jylla Meghalaya, jylla Assam bad ha ka Sorkar Kmie ha u snem 2004, hynrei kim shym leh eiei ban pynbeit ia u pud u sam jong ka jylla Meghalaya bad Assam.

U Bah Bonney u la bynniaw halor ka jingrem dor palat ki kot skul kaba la kot haduh ar ne lai hajar shi klas namar ia kine ki kot la pynmih da ki kompani kot ba don shabar jylla. U la ong shuh shuh ba kine ki kot skul kim ai jinghikai eiei shaphang ka jinglong jingman jong ki shnong bapher bapher ha Meghalaya bad ki jingtip shaphang ka jylla. Ula bynrap ba ka bai kot skul ka nang kiew na u snem sha u snem hynrei ki samla kim ioh kam ioh jam satia wat hadien bala pyndep jingpule.

Ula pynpaw ruh ka jingbynñiaw halor ka jingkylla ka suinbneng (climate change), hynrei kaba sngewsih ka long bun ki riew saiñ hima sima kim shim khia ia kane ka kam bad kala ktah ruh ïaki jingthung jingtep ha kaba ki bam khniang. U Bah Bonney ula ong kila don kiba kynnoh ba ka dei na ka daw ka jingdon ki tower mobile, hynrei kam dei satia bad kadei ka jingkylla jong ka suin bneng.

Halor ka Citizenship Amendment Bill (CAB), u Bah Bonney u la ong kane kam CAB ka la kylla long kum jingialehkai politiks namar ka party kaba wanrah ia ka CAB ka dei ka BJP bad kam shym la wanrah iaka ha dorbar Rajya Sabha dangshen bad kala iap.  U la ong shuh shuh nalor nangta ki party Congress bad ka sorkar MDA ki ïaknieh ban kam burom ba dei ma ki ba pyrshah bala pynduh noh ia ka CAB.