Noh synñiang u MLA Jowai da u khaw sha ki nongshong shnong ka thain

Syllad | The Rising MeghalayaApril 9, 2020

U MLA jong ka Jowai Constituency Ma Wailadmiki Shylla ula mih shakhmat ban noh synñiang da u khaw sha ki longïing bapher bapher ha ki 10 tylli ki shnong mynta ka sngi.

Kine ki shnong kiba la ïoh khaw ki kynthup ïaka Mukhla, Khliehtyrshi, Mihmyntdu, Sabahmuswang, Ialong, Sohmynting, Madur, Niriang, Loomkhudung bad ka Phlongingkhaw.

U MLA jong ka Jowai ma Wailadmiki, ula ong ba hadien ka jingkhang khyrdep ïaka Ri bad ka Jylla naka jingiakhun pyrshah ïaka khlam COVID-19 kala ktah ïaki nongshong shnong ha kylleng ki jaka namar ba ki hap ban shong ha ïing bad kim ïoh shuh ka lad ka lynti ban leit bylla ban pyndap pynbiang iaka jingdonkam ha ki ïing ki sem jong ki.

“Kum u MLA ka thain hadien ka jingud jingnam u paidbah ka constituency ba kyrduh khaw, nga la rai shuwa ban sam sha nongkyndong, iaki khap sor bad jaka sor yn sam ha kine ki khyndiat sngi ban wan. Kane ka jingsam khaw ka dei naka MLA skhim jong nga,” ong u Ma Wailadmiki Shylla bad bynrap ruh ba un nym lah ban pynbiang ïa baroh ki jingdonkam ha kum kane ka por ka khim ka khait, hynrei yn pyrshang katba lah ka bor ban pynïoh mar bam ia baroh ki nongshong shnong.

Ula kyntu iaki paidbah ban iatreilang bad ka sorkar ha kum kane ka por ka saw ka sain bad ban bud iaki jingbthah ka tnad ka koit ka khiah ban lehkhuid bad ban kiar na ki jaka bun briew ban jop ïaka jingkhun ia ka khlam COVID-19.