Noh synñiang ki nongthoh khubor na Shillong sha ka Angels’ Space Pre-Primary School ha ka shnong Kharang

Syllad | The Rising MeghalayaApril 28, 2019

SHILLONG: Ka kynhun ki katto katne ki nongthoh khubor na nongbah Shillong ryngkat ka jingsynñiang u Bah Banteidor Lyngdoh, Myntri sorkar jylla ba dei peit ia ka tnad Sports & Agriculture bad MLA na Mawkynrew Constituency, ha ka 27 tarik u Iaiong, ka la hiar sha ka shnong Kharang ban ai jingiarap sha ka skul Angels’ Space kaba dei ka skul ai jinghikai ia ki heprit ha ki class Pre-Primary lane Kindergarten.

Kane ka skul kaba san snem mynshwa la mut ban pynduh noh namar ki skul Pre-Primary lane Kindergarten ym shym la pynhap ha ka thup jong ki skul ba bei tyngka da ka Sarva Shiksha Abhiyan (SSA). Hynrei ka jingshim khia na ka liang ki kmie ki kpa, ki nonghikai bad ki riew don mynsiem ki la pynieng ia kane ka skul kaba ai jingnang jinghikai kumba 40 ngut ki khynnah mynta.

Ia ka kynhun la lam khmat da ki nongthoh khubor ba la kham rangbah ba kynthup ia u Bah David Laitphlang, President ka Shillong Press Club, u Bah Joe Thangkhiew, u Bah Reigning L Mawphlang, u Bah D Banjop Mukhim, uba dei u dkhot ka bor pyniaid jong kane ka skul ha kane ka shnong lem bad kiwei kiwei. Na ka kynhun ki nongthoh khubor ka la iarap noh synniang ruh sha kane ka skul da ka pisa.

Kane ka skul ka don tang ar ngut ki nonghikai bad lai ngut pat kiba shu wan iarap hikai. Shuh shuh na ka liang ki nonghikai kane ka skul ki la pynpaw ka jingai khublei ia u president ka ka SPC uba kham ha shwa u la dep noh synniang sha kane ka skul da ka Wall TV kaba la iarap ia ki khynnah ban kham lah ban pyn-iar shuh shuh ia ki jingtip lyngba ki video na ka YouTube bad kiwei kiwei.

Kumba long mynta kane ka skul ka long kaba i sangsot ban peit khlem da ia kren khamtam ha ki por slap, haba ki don tang ar kamra kiba rit bad la ker da ki lyntang dieng bad sop da ki tin. Hynrei watla katta ki heprit ha kane ka sngi ki la pynpaw ka jingsngew kmen bad ai ka ka jingshad pdiang burom ia ki dkhot na ki nongthoh khubor ha kane ka kamra long skul.

Hadien kane la pynlong ia ka jingialang kaba lyngkot ha kaba la ioh jingkren na i Headmistress kane ka skul, I Kong W Mynsong, iba la pynpaw ka jingai khublei ia ki nongthoh khubor bad na ka bynta u synniang uba ki la noh.

U Bah David Laitphlang, u la ong ba kum kine ki skul ki dei ki shlem ban sara ia ka jingnang jingtip sha ki heprit ba dang lung bad ai khublei ia ki bor pyniaid skul, ki nonghikai bad kumjuh ia ki kmie ki kpa kiba ai ka jingiatrei lang wat hapdeng ki jingeh ban pynlong ia kane ka skul ban nang kiew sha khmat.

U Bah D Banjop Mukhim, u la iathuh khana lyngkot shaphang ka jingsdang kane ka skul ha kaba ma u lem ka ïing ka sem jong u ki la ai ka kti kamon ka kti ka diang ban kyrshan ia kane ka skul ryngkat ka jingiatrei lang ki kmie ki kpa bad ki nonghikai.

Hadien ka jingiakynduh bad ki bor pyniaid, ki nonghikai, ki kmie ki kpa bad ki heprit khynnah skul, ka kynhun na ki nongthoh khubor ki la leit jngoh ruh ia ka jaka ba don ka pung dohkha jong ka shnong Kharang ha kaba la ia thir kumno ban iarap bad kham pynbha shuh shuh ia kane ka jaka kaba long kawei na ki jaka kiba lah ban khring ia ki nongwan jngoh-kai pyrthei.

Ki don kumba 5 tylli ki pung ha kane ka jaka bad ka shnong ka la rai ban thung dieng ban pynneh pynsah ia ka jingitynnad ka mariang bad sawdong sawkun kane ka jaka bad ban pynneh pynsah ia ka um.