Nga thikna ban jop ia ka elekshon MP ong u Dr. Mawthoh

Syllad | The Rising MeghalayaMarch 20, 2019

SHILLONG: U Kyrtong monlang jong ka Meghalaya Democratic Alliance (MDA) na ka United Democratic Party u Dr. Jemino Mawthoh na ka 1- Shillong Parliamentary Constituency u la ong “nga thikna ba jop ia kane ka MP Election namar ka MDA ka ieng tylli ban iakhun ia kane ka elekshon.”

U Dr. Mawthoh u long u MLA barim jong ka Nongthymmai constituency bad uba long ruh u Associate Professor jong ka Centre for Adult Continuing Education (CACE) North Eastern Hills University bad u long u Chairman barim jong ka Synjuk Ki Seng Samla Shnong Central Body.

U la thep kyrteng mynta ka sngi ban iakhun pyrshah ia u MP ba mynta u Ma Vincent H Pala u kyrtong Congress.

La synran lang ia u Dr. Mawthoh da u Deputy Chief Minister ka jylla u Bah Prestone Tynsong, u ma Sniawbhalang Dhar, Samlin Malngiang, Banteidor Lyngdoh baroh lai ki myntri jong ka Sorkar MDA lem bad kiwei kiwei de.

Haba iakren bad ki lad pathai khubor, u Dr Mawthoh  ula ong ba ka jingioh vote jong ka Congress party ha ka elekshon ba dang shu dep shen haba ianujor bad ka jingioh vote jong ki seng ri lum kaba kynthup ia ka UDP, PDF, HSPDP bad ki Independents bad ka NPP ka heh haduh shiphew arphew shah ban iaka vote jong ka Congress.

U kyrtong monlang jong ka MDA u la ong ba ka long kaba bakla ban ong ba ki paidbah ki jied tang ia ki national party ha ka elekshon Lok Sabha haba u la pynkynmaw ruh ia u Prof. GG Swell (bam kwai ha Dwar U Blei) uba long na ki party ri lum bad u ba la jop ia ka elekshon MP bad udei uba tbit bad trei shitom ban iasaid n aka bynta u paidbah ha Parliament.

“Da ka jingkyrshan jong ka MDA ngan wanrah ka jingiajan hapdeng ka Sorkar Kmie bad Sorkar Jyllla kaba long kaba donkam bha,” u la bynrap.

Haba kylli balei u ieng na ka UDP lada u dei u kyrtong monlang jong ka MDA, u Dr. Mawthoh u la ong ba ki paidbah ki dei ban iohi ia ka  mynsiem iatylli bad jingiatreilang jong ki dkhot jong ka MDA kiba la iawan lang kum shi iing shi sem bad kumta kampher lada ieng na kano ka party. Ba lada u ieng na ka shap monlang ym na ka shap UDP te kala bha ba u ieng noh kum kyrtong shimet, u la bynrap.

Ka UDP ka ieng na Shillong bad ka NPP ka ieng na Tura bad ki iakhun lang ia kane ka elekshon kum ka longiing MDA, u la ong shuh shuh.

Halor ka jingkynnoh jong ka Congress ba ia ka UDP bad NPP kala shah pyniaid  haka BJP, u Dr. Mawthoh u la pynshai ba kane ka dei ka juk ka jingiatreilang bad ha ka sorkar  MDA don arngut ki MLA BJP hynrei kam mut ba ki don ka jingiadei politiks bad ka BJP.