Na ki 330 ngut kiba iabit jingpang COVID-19, 77 percent dei kiba bym pat ioh tika ong ka DC East Khasi Hills

Syllad | The Rising MeghalayaJuly 28, 2021

Ka Deputy Commissioner, East Khasi Hills District Isawanda Laloo ha u kyrwoh ba kala phah kala ong ba na ki 330 ngut kiba ioh thymmai ia u Covid haka 26 tarik une u bnai, palat 77% kidei ki bym pat shim ia ka tika. 

Kala ong ruh ba na kine ki 330 ngut kiba ioh thymmai, tang kumba 3% na kine kidei kiba lah dep ai ia baroh ar dose jong ka tika. 

“Watla kiba lah dep ai baroh ar dose jong ka tika ruh ki dang lah ban ioh iaka jingpang, hynrei na kine ki jingkhein harum, ngi lah ban iohi ba ka tika ka pynduna ia ka jinglah ban ioh ia u jingpang. Kane ka pyni ba kiba lah shim vaccine, ka met jong ki ka lah ban ialeh kham bha ban iada na kaba ioh kem ia u jingpang. Ka tika ka iarap shibun ban iada na ka jing ioh ia ki jingshitom jur, jingdonkam ban thiah hospital bad na ka jingiap,” ong ka kong Laloo.

Ka DC kala ong ba katkum ka jingtip ba la ai na ka tnat jong ka Koit ka Khiah, shispah na ka shispah ki COVID case bal ah phah test ha ka jylla lah lap ba ki dei ki jong U Delta Strain uba dei u jait jingpang COVID-19 uba khlainbor bad uba lah ban saphriang kham kloi, ka ban wanrah ia ka ka jingioh kem thymmai ia ka jingpang ha kiba bun, bad ruh ka jingdonkam thiah hospital.

Ka DC kala kyrpad iaki paidbah ban bud ryntih iaki jingiada ialade kumba lah batai da ka tnat jong ka Koit ka Khiah na ka por sha ka por, kiar ban mih na la ing lait noh satang ha ba donkam palat bad ban leit ai tika noh kloi kloi lada kim pat dep ai ia u tika.

Kala banjur iaki paidbah ban sngapthuh iaki dak ki shin bad ba kim dei ban kheinsting ia ki dak jingshitom kiba paw ha ka met bad pyntip mardor sha u number 14410, lane ha ki war room number jong ka Zone lane ka Block kaba phi sah, lane leit mih sha ki hospital/ CHC/ PHC kaba hajan tam.