Na ka Sorkar Pdeng pan bor pahara u VC ka NEHU ban wanphai biang ha ka 2 tarik Nohprah
U Vice Chancellor ka North-Eastern Hill University (NEHU), u Prof. PS Shukla u la pan bor pahara na Sorkar Pdeng khnang ba un lah ban wanphai bad ban shimti biang kum u VC jong kane ka skulbah ha ka 2 tarik u Nohprah 2024.
U Prof Shukla ha ka shithi sha u Principal Secretary ka Tnad Higher Education ka Sorkar Pdeng u la kdew halor ki jingpynthud kaba jur kaba mih na ki jingiakhih da ka NEHU Students’ Union (NEHUSU) bad ka NEHU Teachers’ Association (NEHUTA), hapoh ka jingialam jong u Prof. Lakhon Kma.
Kane ka jingiakynad kaba la sdang naduh ka 25 tarik Risaw 2024 ka la pynthud ia ki jingtreikam jong ka skulbah. U Prof Shukla u la iathuh ba ka NEHUTA ka la pynthud ia ka jingialang jong ka Academic Council kaba 113, ka la thombor ia ki ophis treikam ba kongsan bad weng jubor ia ki ophisar shwa ban khang ia ki ophis jong ki.Ki nongiakhih pyrshah ki la thombor ruh ia ka ophis treikam jong u Vice Chancellor bad byrngem byrsit bad dawa ban weng ia ki heh ba dei khmih jong ka skulbah.
Na ka liang u Prof Shukla u la pynpaw ia ka jingangnud ban weng ia ki jingeh lyngba ki sienjam kiba thikna, bad ha ka jingpyrshang ban pynbeit ia ki jingeh ha ka skulbah, u la thung ia ki Pro-Vice Chancellors na ka bynta baroh ki artylli ki jaka pule katkum ka NEHU Act of 1973. Hynrei la nang pynjur ia ki jingiakhih da kaba shah thngan, ka jingkhang khyrdep bad ka jingbyrthen pyrshah ia u Vice Chancellor.”
U Prof Shukla u pyntip ruh ba u la pan ia ki lad jingiarap na ki bor sorkar hynrei ki bor pahara ki la pulom ban wanrah ia ka jingjai jai. Ha ka shithi u la pyntip ba ka jinglong jingman ka la long kaba triem shibun da kaba ong, ka jingtreikam baroh jong ka NEHU ka la sangeh, ki nongtrei jong ka skulbah kim lah ban pyndep ia la ki jong ki kamram namar ka jingtieng bad ka jingbym shngain. U la kynnoh ruh ba ki briew ki bym don bor ki la shim ia ka bor halor ki kam bad pynmih ia ki hukum kiba beain.
Namar ka shuti ka jong u kan kut noh ha ka 29 tarik Naiwieng, kumta ruh u Prof Shukla u la kyrpad na ka Sorkar Pdeng ban pynbiang ia ki bor pahara khnang ban pynthikna ba un wanphai biang ha ka 2 tarik Nohprah. Kane ka shithi jong u ka kynthup ia ka jingthoh kaba bniah halor ki jingjia bad ki jubab ia ki jingkylli jong ka Ministry of Education.
Facebook
Instagram
Youtube
Twitter
Ong ia oo u lai wan sha thaw/ state lajong lait u pan centre force,la da sniaw u myn m u man safe u kreh chei ni.Ka Central Government leh to u e lad ko ia ki bru wa m na State u man Kam u vc.