Na Jowai yn sdang iaka Meghalaya State League

Syllad | The Rising MeghalayaApril 26, 2023

Ka Meghalaya Football Association (MFA), haka sngi Balang kala wan shakhmat ba kan shim ia ka sien jam ban pyllait paidbah ia ka trophy, ka sur jingrwai, ka website: themsl.in  bad kaba kham kongsan eh ia ka jingpyniakap (grouping) bad ki fixtures, ba dei naka bynta ka lympung ialehkai Phutbol ba heh tam haka jylla ka Meghalaya State League ne ka MSL.

Ia kane ka jingialang la pynlong ia ka ha State Convention Centre, ha kaba la iadonlang da u President ka MFA bah Larsing M Sawyan, u Assistant Secretary bah Dip Ryntathiang, ki vice president, ki dkhot bad ki nongialam ki synjuk ialehkai phutbol jong  baroh ki district, ki kapten bad ki player jong ki team ba la ioh ban iashim bynta ha kane ka  ka lympung kaba mynta ka kynti.

Ha kane ka kynti, na ka liang ka Tournament Committee ka MSL ka la phiah ia kane ka lympung ialehkai ha ki saw tylli ki jaka ne zone, katta kum ka Shillong, Jowai, Mawkyrwat bad ka Tura, bad ia ki team ba la ioh ban iashimbynta baroh la pyniakap pat ia ki ha kine ki jaka ba la buh ban pynlong ia ka jingiakob.

Ha Shillong Zone, ki team ba la pyniakap  ki long  Mawlai SC, Umrit SC, Umkseh SC, Jyntru, Seng Samla Laitryngew, Langsning SC.

Ha Jowai Zone ki team ne club ba la pyniakap ki long 7 Wasa United, Ladthadlaboh SC, Youth Club Pdengkarong, Rangdajied FC, SeinPynbhalang SC, Rymbai Iawpynsing SC, Mulait United FC.

Mawkyrwat Zone ki team ne club ba la pyniakap ki long Pyndengrei SCSC, Shillong Lajong FC, Seven United SCC, Mawten SC, Riangdo YSCA, Lumdiengngan SC,  katba ki kynhun ba la pyniakap ha Tura Zone ki long Chipakkore FC, Selsella Sports Association, Atong Matrik FC, Warima YC, Wasa FC, Khliehmawlieh YC.

Tura Zone – Chipakkore FC, Warima YC, Wasa FC, Atong Matgrik FC, Khliehmawlieh YC, Selsella Sports Association

Ia kane ka lympung ialehkai kat kum ka prokram ba la pyllait la buh ban sdang ha ka 12 tarik u bnai Jymmang ban sa wan da kaba sdang shwa ia ka jingialehkai ba nyngkong ka Jowai Zone bad ki artylli ki kynhun ban iakhun nyngkong dei ka 7 Wasa  United pyrshah ia ka Rangdajied United FC.

Haba kren ha kane ka jingialang u President ka MFA bah Larsing M Sawyan, u sngew ban  ong ba ka jingkhreh ban pynlong biang ia kane ka lympung ka long ka thong bah ia ka MFA namar u la pynkynmaw ba  la lah ban pynlong biang ia kane ka lympung ar snem hadien ba la hap ban pynsangeh noh ia ka namar ka jingwan ban lyngshop jong ka jingpang iabit Covid-19, nalor katta u la batai ruh ia ka jingthmuban nang pynkylla ia ka dur ka dar jong ka MSL ha ki sngi ki snem kiban wan, khlem da klet ban iathuh ruh ia ka sien jam ba ka MFA ka la khreh ba kan leh bad katta ka long ba nangne shakhmat kan phai khmat lang ruh noh wat ha kaban pynlong ia ka lympung ba kyrpang mia ki thei samla ba don ia ka sap ia ka phutbol.