Mynta ka sngi yn pynkut iaka iew ba ar sngi bad SHG Mela ha Ladthadlaboh, ïoh har rukom ki mar bam, tiar shna kti bad kiwei

Syllad | The Rising MeghalayaDecember 15, 2023

U MLA ka Jowai, u Ma Wailadmiki Shylla ula plie paidbah iaka iew kaba ar sngi kaba tip kum ka Buyer Seller Meet cum SHG Mela ha Ladthadlaboh, Jowai haka 14 tarik Nohprah.

Ia kane ka iew la pynlong da ka ophis u Deputy Commissioner West Jaintia Hills bad ka Meghalaya State Rural Livelihood Society (MSRLS) kaba la shimbynta da ka kynhun ki SHGs, Producer Group bad kiwei kiwei ki nongseng kam lajong.

U  Wailadmiki Shylla haba kren ula ong ba donkam ban phai khmat sha ka kam rep riang, kam ri jingri, tiar shna kti bad kiwei kiwei bad ban jur iaki samla ban nym shaniah than tang ha ki kam sorkar.

Ula pynshlur iaki samla ban shimkabu iaki skim sorkar kiba la pynkup bor iaki samla ban seng kam lajong katkum ka sap bad ka jingtbit bad jingshemphang jong ki. Ula iaroh iaka tnad DCIC department, ka Skill Development Society kiba la ai jinghikai halor ki kam bapher bapher.

Ka District Mission Management Unit kala ithuh bad sam ruh iaki khusnam sha ki nongialam SHGs ka Thadlaskein bad Laskein Block sha ki Krishi Sakhi bad Pashu Sakhi.

Kine ki Krishi Sakhi bad ka Pashu Sakhi ki dei ki briew kiba la shah hikai pyntbit ha kaba iadei bad ki kam rep bad kam ri jingri bad ki dei maki kiba iarap ia kiwei ki nongrep sha ki jaka ba kyndong ha kino kio ki kam ban kyntiew iaka kam ri jingri bad rep riang.

Ha kane ka iew kaba kut mynta ka sngi 15 tarik Nohprah lah ban ioh har rukom ki mar bam, syntiew skud, tiar shna kti bad kiwei kiwei kiba la pynmih da ki kynhun SHGs bad ki Producers Group bad ki nongseng kam lajong.