Mynsaw ki shi kurim bad u khun rit ba tynrah ka Bolero ia ka scooty ba ki shong

Syllad | The Rising MeghalayaMarch 20, 2024

Ki laingut ki dkhot ka longiing kaba kynthup ia ki shikurim bad u khun shynrang uba dang shi snem shiteng ki la ngat ha ka jingmynsaw jur hadien ba ka scooty kaba ki shong ka la shah tynrah ha kawei ka kali Mahindra Bolero Pick Up ha ka janmiet jong ka 18 tarik mynta u bnai ha Lad Mukhla, West Jaintia Hills.

Na ka liang ki pulit ki la iathuh ba kine ki dkhot ka longiing kiba la mynsaw ia kiba la tip kyrteng kum  Samborlangki Dkhar, 20 bad ka kurim jong u ka  Erinsha Langlein,19 snem rta nalor u khun rit jong ki, ki dang shong da ka Scooty kaba don ia u No (ML 04 D 6364) da ka jingthmu ban leit sha Ummulong hadien ba kane ka jingjia ba sngewsih ka la wan jia.

Ki pulit ki la ong ba kane ka scooty kaba ki shong ka la shah tynrah ha ka Mahindra Bolero Pick up kaba don ia u nombor  (ML04D-0473) ia kaba la niah da u briew u bym lah ban ithuh kaba dang wan sha ka liang ka thain Jowai da kaba iaid wrong side. Kane ka jingjia ka la jia ha ka lynti surok bah NH-6 hajan ka jaka ba khongdong bha hapoh ka shnong Lad Mukhla.

Ki pulit ki la iathuh ba ia kine ki dkhot ka longiing la pynkit noh shapoh ka hospital da ki riew paidbah. Hadien ia u Samborlangki la pynkynriah noh sha NEIGRIHMS Shillong bad la pyllait noh hynne ka janmiet sngi ba Ar, katba ia ka kmie bad i khun la pynkynriah noh shapoh Civil hospital Shillong ha kaba la bat noh ia ki na ka bynta ban aijingsumar.

Na ka liang ki pulit ki la iathuh ruh ba u nongniah jong katei ka Mahindra u la phet krad noh na katei ka jaka bad um pat shym la wan mih shapoh Beat House naduh katei ka jingjia.