Mynjur ka Sorkar Pdeng ia ka projek Highway ba T. 22,864 klur na Shillong sha Silchar

Syllad | The Rising MeghalayaMay 1, 2025

Ka Cabinet Committee on Economic Affairs ba la khlieh da u Myntri Rangbahduh ka Ri u Narendra Modi ka la mynjur ban pyntrei bad maramot bad pyniaid ia ka project surok Greenfield Corridor Highway Project 4-lane kaba 166.80 km na Mawlyngkhung (najan Shillong) ha Meghalaya sha Panchgram (hajan Silchar) Assam.

Ia kane ka surok yn pyntrei haka dur jong ka Hybrid Annuity Mode ha ka jinglut ka ban kot haduh T.22,864 klur. Ka jingjrong jong kane ka project ka long haduh 166.80 km sha ki bynta ka Meghalaya bad 22.00 sha Assam.

Kane ka Greenfield Corridor kan pynsuk bad pynkylluid ha ka leit ka wan jong ki kali na Guwahati sha Silchar bad kan pynsuk ia ka lad pyniasoh sha kiwei pat ki jylla kum ka Tripura, Mizoram, Manipur bad ka thain Barak Valley ka Assam na ka nongbah Guwahati bad ka pynduna ruh ia ka por ha ka leit ka wan.

Kane ka surok kan pynsuk ruh ha ka jingpyniasoh hapdeng ka Assam bad ka Meghalaya bad kan kyntiew ia ki kam khaii pateng bad ka roi kynthup ia ka jingkiew jong ki kam karkhana ha Meghalaya namar ka iaid lyngba ia ki karkhana pynmih dewbilat bad dewiong.

Nalor kata kane ka surok kan pynsuk ruh ia ka leit ka wan jong ki nongshangkai pyrthei na ka ri bad bar ri kiba wan na ka kad liengsuin Guwahati, Shillong bad Silchar lyngba ka surok NH-06 kaba la don lypa kaba pyniasoh ia ka Guwahati sha Silchar bad ka ban khring ia ki nongwan shangkai pyrthei sha ka thain shatei Lammihngi bad kyntiew ia ki kam jngohkai.

Kane ka surok kan iaid lyngba ia ka Ri Bhoi, East Khasi Hills, West Jaintia Hills, East Jaintia Hill District ha Meghalaya bad ka Cachar District ka Assam bad ka ban iarap ban pynduna shibun ia ka jingkhapngiah jong ka surok NH-06 kaba la don lypa bad ka ban iaid ryngkat bad ka PM Gati Shakti National Master Plan.

Ka jingpyniasoh jong kane ka project ka long ruh ba kiwei kiwei ki surok bah kiba kynthup ia ka surok bah NH-27, NH-106, NH-206, NH-37 kaba pynsuk ia ki lad pyniasoh sha ki sorbah bad ki sor rit kiba kynthup ia ka Guwahati, Shillong, Silchar, Diengpasoh, Ummulong, Phramer, Khliehriat, Ratachera, Umkiang bad Kalain.

Hadien ba la dep, kane ka surok Shillong -Silchar kan shim ia ka bynta kaba kongsan ha ka roi ka par jong ka thain, kan pynbha ia ki jingpyniasoh hapdeng ka Guwahati, Shillong, Silchar, Imphal, Aizawl bad Agartala. Kane ka project ka pyniasoh ruh bad ka jingthmu jong ka sorkar halor ka Atmanirbhar Bharat ka ban kyntiew ia ki jingtei bad plielad ha ka liang ka aikam iajam bad kyntiew ia ka roi ka par ha Meghalaya, Assam, Manipur, Mizoram and Tripura.