Mudui PIL ka SEP&SD bym pyntreikam ka sorkar jylla ïaka pisa pynbha mariang T.433 Klur

Syllad | The Rising MeghalayaApril 10, 2019

JOWAI: U President jong ka Society for Environmental Protection and Sustainable Development (SEPSD) u Wanbun Dkhar ba shong ba sah Khliehtyrshi, West Jaiñtia Hills District haka 9 tarik u Iaiong  ula mudui Public Interest Litigation (PIL) ha ïingbishar jong ka Meghalaya High Court pyrshah ïaka sorkar jylla, ki tnad ba dei khmih ïaki mar poh kyndew bad kiwei halor ka jingbym pyndonkam ne pyntreikam ïaka Meghalaya Environment Protection & Restoration Fund (MEPRF) kaba la kot T.433 Klur .

Kane ka pisa dei kaba la oh khajna na u dewiong bala dep tih bad thew ha ki par dewiong naduh ba khang tih dewiong hapoh ka jylla na u snem 2014 da ka National Green Tribunal Principal Bench.

Une Nongïalam ka SEPSD Wanbun Dkhar ula ujor ïa kane ka PIL pyrshah ïaka sorkar jylla namar ba wat hadien bala ïoh lum kane ka pisa T.433 klur, hynrei ym pat don kino kino ki dak ki shin ba ka sorkar kan pyndonkam ïa kane ka pisa ban pynbha biang ïaki jaka ba shah pynjulor ka mariang na ka jingtih dewiong.

Ka jylla Meghalaya ka la ïoh lum kane ka pisa T.433 klur na ka khajna Meghalaya Environment Protection & Restoration Fund (MEPRF), kaba la lum katkum ka jingbthah jong ka National Green Tribunal na u dewiong bala dep tih bad thew ha ki par dewiong. Ka jingthmu jong ka NGT ban oh ia kane ka khajna na u dewiong ba shallan bad dep tih ka long ban pynbha pynmiat ïa ki mei mariang kaba la shah pynjulor na ka kam tih dewiong ha ka jylla.

Ka NGT kala khang ïa ka jingtih dewiong ha ka jylla Meghalaya naduh u bnai Jymmang 2014 hadien ka jingshah ujor ha ka All Dimasa Students Union Dima Hasao District Committee pyrshah ïa ka Jylla Meghalaya halor ka nongrim ba ka jingtih dewiong ka pynjakhlia ïa ka umbam umdih bad jaka rep sha ki bynta ba sharum ka Wah Kupli.