Mih surok ki khynnah skul ban pyrshah iaka jingdih & bam duma ha West Jaintia Hills

Syllad | The Rising MeghalayaMay 10, 2023

Kum shibynta ban rakhe iaka World No Tobacco Day 2023 ka ban long ha ka 31 tarik Jymmang ne ka sngi kaba baroh satlak ka pyrthei ka ialap iaka jingma bad jingsniew ka jingbam bad dih iaka duma ne Tobacco, ki khynnah skul haman ki shnong ki thaw ka Jylla ki la mih iashimbynta ha ka Tobacco Rally bad Signature Campaign.

Ka mat pdeng jong ka jylla ka long “My Meghalaya, Tobacco Free Meghalaya”.

Ha West Jaintia Hills District la sakhi ia ka jingiashimbynta shongshit ki khynnah skul haka Rally Against Tobacco bad ka Signature Campaign kaba la pynlong ha ka dur jong ka jingiakop hapoh ka jingpeit jingpyniaid jong ka State Tobacco Control Cell ryngkat ka jingiatreilang ka State Education Department bad ka Sambanh Health Foundation.

Ka Jylla Meghalaya kadei kawei na ki Jylla ba bun eh ki briew ba kyrni ha ka jingdih biri, siktret, duma bad ka long ruh ka Jylla ba bun eh ki briew baioh ia ka jingpang bampong na ka daw jong ka jingdih biri, sikret, duma. Ka duma ym tang ba ka ktah ia uba dih, hynrei ia uba ring mynsiem iaka tdem duma bad pynsniew ruh iaka mariang.

Ka Jylla ruh ka shah ktah bha na ka jingdih duma bad da ki hajar ngut ki iap na ka jingdih duma.

Kumta ka jingpynlong ia kane ka prokram ka long shibynta ban khot kyrpad bad wer ia ki paidbah nongshongshnong ban kin iatreilang da kaba kiar na ka jingmlien ban im ryngkat ka jingpyndonkam ia u biri, sikret, duma kiba long ka bih ia ka jingim ba kordor jong ki briew.