Mih ryntih u khun Niamtre ban lehkmen haka Behdieñkhlam dap smam ka Iawmusiang

Syllad | The Rising MeghalayaJuly 13, 2022

Kumba ju long ka rukom ka sngi ba ar jong ka Behdieñkhlam, ka long ba ki kmai raij kila wan shaw iaki diengkhlam bad pynpoi ha Iawmusiang bad ka Khonraij (Chilliangraij) kila pynpoi ïaka Khnong Blai ha Loomsooiung.

La sakhi ba haka sngi ba ar ka Iawmusiang kala dap smam hadien bala wan shaw iaki diengkhlam. Ki khun jong ka Niamtre kila mih ryntih da ka mynsiem iatylli kynthei bad shynrang ban shad kmen Behdieñkhlam ryngkat ka jingsawa ka bom bad ka jingud ka bhuri (tangmuri) bad ka chew chew.

Haka por mynstep ki khlieh nongpyniaid niam kila pyndep iaka jingai nguh aidem Syiem Aitnar kaba iadonlang naduh Dolloi, Pator, Langdoh, Sangot, wasan waheh bad ki Kñi na ki kur bapher. Ka jinglehniam Syiem Aitnar ka long ba ymbit shuh ïa uno uno ne kano kano ka briew ba kin leh tamti tamkjat haka pung kyntang Aitnar.

Haka sngi kaba lai (mynta ka sngi) yn rah biang iaki diengkhlam na Iawmusiang bad ban pynieng hala ki jong ki dong, katba ïaka Symbood Khnong yn rah na Loomsooiung naduh ka por mynstep bad pynieng ha Khliehshnong.

Shuwa ban rah iaki diengkhlam, yn ai nguh ai dem iaka Khnong Blai hapoh Sawiar ka ban pyndep da u Dolloi bad u Kni Nikhla. Ha kane ka por baroh ki bom bad ki tangmuri ki sangeh bad ki diengkhlam yn buh ha madan Siatthong ban ainguh blei bad hadien yn rah iaki diengkhlam hala ki jong ki dong.