Mar ia shimti ka DGP bathymmai, ioh kurup drok ba shongdor palat 5 klur na East Jaintia Hills

Syllad | The Rising MeghalayaMay 21, 2024

Tang shi sngi hadien ba ka Kong Idashisha Nongrang IPS, ka la shimti kum ka  Director General of Police (DGP) bathymmai ka Jylla, ki pulit ka Tnat ANTF hynne ka step sngi ba Ar ki la ioh ban kurup ia u drok heroin uba shongdor haduh T.5.5 klur na ka thain Lumshnong, East Jaintia Hills bad kem noh ia u briew uba donkti.

Hadien ba la ioh ia ka jingtip kaba thikna ka Tnat ANTF hapoh ka jingialam u Additional Superintendent of Police, East Jaintia Hills ha ryngkat ki pulit ka Lumshnong Police Station ki la pynlong ka jingpynap shrip bad ioh ban bat noh ia kawei kali Tata Sumo kaba wan napoh Silchar Assam.

Hadien ba ki pulit ki la pynlong ia ka jingtalasi ki la lapdien haduh 58 tylli ki synduk sabon ha kaba la thep ia u drok heroin uba don haduh kumba 609 gram bad uba shongdor haduh T.5.5 klur.

Ki pulit ki la kem noh ia u briew uba la shah suba donkti ia uba la tip kyrteng kum u Lalbiakdik Vaiphei 39 snem rta uba dei napoh Mandanriting, East Khasi Hills Shillong. Hadien ki pulit ki la kurup noh ia ka kali kumjuh ia ka mobile phone ba la pyndonkam da une u briew.

Mynta ki pulit ki la rejistar case pyrshah ia une u briew hapoh ki kyndon ka NDPS bad ka jingtohkit ka la iaid shakhmat.