Mana ban ïalap elekshon ïaki Muster Roll

Syllad | The Rising MeghalayaFebruary 18, 2019

JOWAI: Ka Jaintia Public Works Department Muster Roll Workers & Labour Union (JPWDMW&LU) kala mana ïa baroh ki nongtrei muster roll ba kim bit ban ieng rynsan ban ialap elekshon naka bynta uno uno u kyrtong.

Ka JPWDMW&LU kala pynbna ïa kane  haka jingïalang paidbah jong ka synjuk kaba long ha Enowell Hall, Amlarem haka sngi Nyngkong. Ha kane ka sngi ka JPWDMW&LU kala thaw ruh ïaka tnad JPWDMW&LU, Amlarem Unit.

Ki nongkitkam ka JPWDMW &LU, Amlarem Unit ki kynthup ïa President u Ma Valiant Sing Pohkyrnu, Vice President u Ma Medinand Mukhim, General Secretary u Ma Manywell Tongper, Assistant General Secretary u Ma Owanli Tariang, Treasurer ka Kong Pynskhem Nongpluh ha ryngkat bad ki 7 ngut ki executive member.

U KL Pariat President JPWDMW&LU haba kren ula iathuh baka sorkar MDA kala mynjur ban pynkiew ïaka bai nongsngi kaba T.196/ shisngi sha ka T.300 shi sngi bad ka sorkar kan siew da kaba thymmai naduh u Risaw 2018.

Ha ka juh ka por ula ïathuh ba la pynjlan ïaka por shongthait ki Muster Roll naka 58 snem sha ka 60 snem bad ka sorkar kala mynjur ruh ïa kiwei kiwei ki jingdawa ka seng.

Kiwei kiwei kiba kren ki kynthup ïaka Kong D. Ïakai Vice President JPWDMW&LU kala ïathuh ïaka rukom ioh arrear bad kiwei kiwei ki jingsiew ba ki muster roll sha ka tnad Labour.

U Ma L Nartiang Branch Manager ka Meghalaya Apex Cooperative Bank Pvt. Ltd, Amlarem, ruh ula ïadonlang bad ula pysngew ïaki lad jingiarap ba ka bank ka lah ban ai sha ki nongtrei muster roll.