Maham ka tnat ka koit khiah ban ym bam klumar ia ki jhur tit, 7 ngut la duh ei iaka jingim ha Jylla

Syllad | The Rising MeghalayaJune 6, 2024

Ka Tnat ka koit ka khiah ka Sorkar Jylla ka la buh ka jingmaham bad kyntu ban ym bam klumar ia ki Tit khlaw namar ki lah ban buh ka jingma kaba khraw namar ki don ki jait Tit kiba don ia ka bih kaba khlain bad kaba lah ban pynshitom jur ia ki briew.

Na ka liang ka Director of Health Services (MCH&FW) Cum Joint Mission Director, NHM ka Sorkar Meghalaya lyngba u kyrwtoh ka pyntip ba ka State Surveillance Unit jong ka Integrated Disease Surveillance Program (IDSP) ka la lap ruh ba kiba kum kine ki jingjia ki ju kham jia ha ki bnai lyiur, kata naduh u bnai Jymmang haduh u bnai Risaw.

Ha une u snem 2024 kat haduh mynta ki la don haduh 27 tylli ki jingjia ioh bih lyngba ka jingbam ia u Tit khlaw ba long bih, bad ka long ruh kaba sngewsih ha kaba haduh 7 ngut ki la duh noh ia la ka jingim.

Kane ka la kham kiew haba ia nujor bad u snem 2023, ha kaba ki la don haduh 40 tylli ki jingjia hynrei ym shym la doh kiba iap.

Ki dak ki shin lyngba ka jingioh bam ia ki Tit khlaw kiba long bih ka long ka jingthut ha ka kpoh, ka jingpang ha ki dohksah bad prie. Ha ki jingjia kiba la kham jur ka don ka jingthynrang, ka jingmih syep kaba jur, ka jingruma, bym tip briew bad ka jingshah ktah kaba lam sha ka jingsniew noh u Dohnud ne Liver.

Na ka bynta ka jingshngain la aijingmut ban kiar na kaba bam ia ki Tit khlaw khamtam lada artatien lane ym don jingtip kaba thikna ia u Tit uba ki kheit.

La kyntu ruh ban long kiba husiar ha ki jaka ba leit ban kheit ia u Tit, namar ki dei kiba lah ban kjit ia ka bih na ka mei mariang.