Maham ka Pamrakmai Shnong ban khring vote da ka tyngka pliah bad leh jakhlia

Syllad | The Rising MeghalayaFebruary 14, 2019

JOWAI: Ka Dorbar shnong Pamrakmai Shnong kala pynbna paidbah ba kala mana bad maham ïa baroh ki nongkyrshan ne nongialam kiba nabar ka shnong ban khring vote da kaba pyndonkam tyngka pliah bad ban leh jakhlia haka jingialap elekshon hapoh shnong Pamrakmai.

Kane ka jingmana kan treikam ïa baroh ki kyrtong MDC na Muthlong Sohkymphor, lada lap ba uno uno u nongkyrshan ne nongialam jong u kyrtong ba ki leh pyrshah, u kyrtong uba ki kyrshan un hap ban kitkhlieh.

Ka Dorbar Shnong ka kyntu ïa baroh ban iatreilang bad ka shnong ban ïaid beit ïaid ryntih ka jingialap elekshon bad baka elekshon kan long kaba suk kaba saiñ haryngkat jinglehkhuid khlem da bret pathar iaki bitor ki plastic haka jaka ialap elekshon.

U Secretary Shnong Pamrakmai Tbn. IK Rymbai ula ong ba ïa kane ka rai la shim haka 14 tarik Rymphang ha ka jingialang jong ka dorbar shong ha ka jingïadei bad ka jingialap Election MDC sha ka ïing dorbar thawaiñ ka JHADC.

Ka Shnong Pamrakmai Shnong ka pdiang sngewbha ïa baroh ki kyrtong ban ialap elekshon hapoh shnong, hynrei la kyntu ba kin bud ryntih ïaki kyndon bala buh ka bor district bad ka bor pynïaid election.