Maham ka JSU iaki Karbi ba kynshoit ban thaw klumar ha Khanduli, pynrem iaka sorkar ba dem tdong ha ka sorkar Assam

Syllad | The Rising MeghalayaMay 12, 2023

Ka Jaintia Students’ Union (JSU) kala maham tyngeh iaki nong Karbi kiba shong ba sah ha Khanduli khappud Assam Meghalaya kiba kynshoit ban thaw klumar bad pynshit ban wanrah iaka jingiakynad kaba ktah iaka shongsuk shongsain.

U general secretary JSU, Treiborlang R Suchien ryngkat bad ki dkhot JSU na Nartiang bad kiwei kiwei marsien jia ka jingiashoh iasdat ki paid Karbi bad nong Khanduli haka sngi Palei.

La iathuh ba kane ka jingiakynad kala mih hadien ka jingshah thombor ki nongrep kiba la shah thang ki trep buh kba ha madan Khanduli ha ki paid Karbi ha madan Khanduli.

Hadien kane ka jingjia iathang kala mih ka iasyndong kti bad iashoh iadat hapeng ki Karbi bad Pnar kaba la wanrah ka jingmynsaw uwei u Karbi.

U SP West Jaintia Hills uba la hiar sha katei ka jaka ban iakren ban tem iaka jingiakynad, pynban u Karbi uba khie bitar bad khie wahleng kila kawang da ki maw bad da ki tiar ba nep kum ki kynja wait bad kiwei iaka kali u SP. Ha kane ka jingjia u SP ula lait da ka sait na kane ka jingjia.

Na ka liang ka JSU kaba la hiar sha Khanduli naduh hynnin ka sngi kala ong ba kane ka jingleh ki Karbi kadei ka jingleh riewkhlaw bad kim burom shuh iaka DC Hamren bad ki SP West Jaintia Hills kiba pyrshang ban tem ia kane ka jingkynad bad shim iaka ain ha kti.

Ka JSU kala kyntu iaka bor pyniaid district ka West Jaintia Hills ban mudui ujor ejahar lane shim hi noh iaka case pyrshah iaki nong Karbi.

“Ngi pynrem iaka sorkar Jylla ba wat hadpeng ka jingkyan ka iakynad hapdeng kine ki ar jaidbynriew ha kane ka jaka khappud haduh mynta mynne ka sorkar kam shym la shimkhia ban iakren bad kane ka jingeh kala kut tang hapdeng ki bor district ka West Karbi Anglong bad West Jaintia Hills. Kane ka jingleh mynthi ka sorkar Jylla ka pyni shai kdar ba ka sorkar Meghalaya ka pyndem tdong hakhmat ka sorkar Assam,” la ong u nongialam ka JSU.

Ki sengbhalang kiba la hiar ai mynsiem iaki nong Khanduli naduh hynnin miet ki kynthup iaka KSU, JSU.