Maham ka HYC ba ym dei ban pyndonkam bakla iaka pisa SAG ha KHADC

Syllad | The Rising MeghalayaMay 5, 2019

Ka Special Assistance Grant ba ai bhah ka Sorkar Kmie ha KHADC kam dei ban poi sha ka pla jongno re jongno bad ban pyndonkam bakla ia kane ka pisa, hynrei dei ban pynpoi hok sha u paidbah.

Ka KHADC ha kine ki snem kiba la leit kala paw ha ka jingshna ia ki aiñ iada Ri ki ban iada ia ka jaidbynriew Hynniewtrep. Hynrei tang 2 bnai ba wan ki MDC thymmai ngi iohi pynban ba ki ia knieh iaka song pisa SAG ka sorkar kmie bad kane kalong kaei kaei ka bym lah ban pdiang bad kane ka dei ka jing ñiewbein ia ka jingangnud jong ka jaidbynriew na ka KHADC. Ka jaidbynriew ka angnud na ka KHADC ba kan wanrah ki aiñ ban iada ia ka jinglong ba kyrpang ka jaidbynriew, ka riti dustur, ka khyndew ka shyiap, dorbar trai ri bad ban bud dien ia ki aiñ kiba la dep thaw kum ka Khasi Lineage Bill bad kiwei kiwei ki aiñ.

Ka HYC kala ong ba EC thymmai khamtam ka tnad Trade bad Labour kila shimkhia ban trei na ka bynta ban tem bad ban khanglad iaka jingkamai spah beaiñ u barjylla, hynrei  sngewsih ba ki don pat kiba bunkam ha ka ia knieh pisa bad ia knieh shuki.

Ka jingshlur jong kine ki MDC ban ia knieh pisa bad ia knieh shuki imat kadei na ka daw ba ki dang thmu bad ki sngew ba ki lah ban hukum ia ki officer ka council ban kin thep ia ka pisa paidbah ha ki account shimet jong ki, kumba la kynnoh ba mynshwa ba u CEM (Bah P N Syiem ) u la hukum ia u secretary ka KHADC  ban shim ia ki pisa ka professional tax ban thep ha ki personal account bad ban ia pyndonkam bakla ia ka pisa lyngba ka Monolith festival bad kiwei. Ngi lyngngoh ba haduh mynta ka police department kam pat lah ban pyndep wat tang ia ka investigation halor kane ka kam.

Ka jing bym pat pynshitom ia u nonghukum bad nongleh ia kane ka kam beain ban thep Pisa ha ki personal account bad ki nong pyndonkam bakla ia ki Pisa ha ka monolith festival ka pynlong ia ki MDC Mynta ban ia khieh ia kane ka pisa da kaba mutdur ba kin ioh thep ha ka pla lajong.

Ka HYC ka dawa bad maham ia baroh ki MDC ba ka pisa lyngba ka Special Assistance Grant kadei ban poi sha ki paidbah ym ha ki account jongno re jongno kumba long mynshwa . Ngim tuklar mar katno phi ia sam hynrei ki dei ban pynthikna ba kan poi hok sha ki paidbah. Ngin buddien ban pynthikna ba wat tang shityngka na ka pisa ba la mang ban pyndonkam ymdei ban rung ha ka personal account jongno re jongno.

Ka seng ka kyntu ruh ia baroh ki MDC ba ki dei ban ia pynleit jingmut ban iada ia ka jaidbynriew ha baroh ki liang  da kaba wanrah bad shna ia ki ain bapher bapher bad ki polisi treikam bapher bapher ym ban ia bunkam ha ka jingiaknieh pisa ne pynkhyllem shuki. Ngi kyntu ba phi ia shna ia aiñ iada Ri  ym ban ia knieh shuki. Ka jaidbynriew ka donkam ia ki nongshna aiñn ban iada ia ka Ri ym ia kiba rhah shuki.

 

Roykupar Synrem

General Secretary

HYC, CEC