Lyngba ka RTI lap ka HNYF ba ki don bun ki kam ba thylli ha ka ophis ka Tnad Sericulture

Syllad | The Rising MeghalayaSeptember 21, 2024

Ka Seng Hynniewtrep National Youth Front (HNYF), West Jaintia Zone ha ka 20 tarik Nailur ka la leit buh da ka jingthoh sha ka ophis u Deputy Commissioner, West Jaiñtia Hills District halor ka jingdkhoh treikam jong ka tnad Sericulture kaba don ha kylleng ki jaka jong ka District.

Ka Seng ka pynpaw ruh ba katkum ka ka RTI ba la ioh pdiang na ka ophis ka District Sericulture Officer la lap ba don haduh 22 tylli ki rearing center hapoh Jaiñtia Hills, hynrei ki don tang katto katne ki jaka kiba treikam, bad haba peit ha kiba bun hi ki jaka treikam ym don tang ki ophis ba paka lane ki nongtrei ha kitei ki jaka .      

Nalor kata  lyngba ki RTI la lap ba na kitei ki 22 tylli ki Center ki don haduh 14 tylli ki post kiba la thylli mynta la bun tylli ki snem, kata  naduh ki Demonstrators bad kiwei.

Nalor kata  la lap ruh kine ki center, kum ka ha Nartiang, Ummulong, Ksehrynchang, Moodymmai, Kdiap, Mutapun, Saitsama bad Namdong ki la don bun kiba la pass ia ki training naduh u snem 2008 haduh 2013 kumba 19 ngut bad kila don ka hok ban ioh ia kitei ki kam kat kum ka lynti.          

Kumta ruh halor kine ki jinglap na ka liang ka seng HNYF ka la leit buh da ka jingthoh sha ka ophis jong u Deputy Commissioner ban tuklar ia kine kiei kiei baroh bad la kyntu ruh ia baroh ki Sericulture Demonstrators kiba dei peit ia kine ki jaka ba kin trei hok bad pyndep hok ia la ki jong ki kamram khnang ba kan plielad ia ki samla jong ka thain Rilum Jaintia ha ka ioh kam ioh jam.