LIVE | SYLLAD | Sdang rakhe dap 50 snem ka Meghalaya da ka lehniam #Behdieñkhlam ka Seiñraij Jowai

Syllad | The Rising MeghalayaJuly 11, 2021

Ka Lehniam #Behdienkhlam jong ka Seiñraij Jowai mynta ka kynti kan long kaba khampher watla ki khun ka Seinraij Jowai kim ioh ban iashimbynta kumba ju long ban iamih paidbah ban shad bad kynhoi risa ha ryngkat ka jingsawa ka bom ka bhuri ne tangmuri, hynrei kane ka Behdieñkhlam kan neh sah khana namar la sdang iaka jingrakhe iaka jingdap 50 snem ka jingioh jylla ba pura bad ka jngioh laitluid na ka jingsynshar ka sorkar phareng kaba 75 snem.

Ka jingwan lynsher ka jingpangkhlam COVID-19 haka sien kaba ar haka Jylla bad ka ri kumjuh satlak ka pyrthei kala wanrah ka jingthud haka rukom im u briew ha kaba ula hap ban kylla haka rukom leh naduh ka iaid ka ieng, ka rukom im bad ka rukom trei ktah bad kiwei kiwei ki jait kam.

Hynrei ka Seinraij Jowai ban iaid beit ka niam ka rukom kala pynkhreh nadong shadong iaka SOPs ne kyndon ban bud ryngkhi iaki adong adit COVID-19. Kala ioh ka jingmynjur na ka sorkar ban pynlong iaka Behdieñkhlam bad la kyrshan iaka Seinraij Jowai da ka Ministry of Culture bad ka Art and Culture ka Jylla ban lehkmen ia kane tamasa kaba paw ha Jylla bad ka ri baroh kawei.

Tang kiba la dep ai tika COVID-19 kiban ioh ïashimbynta haka Behdieñkhlam

La sakhi ba naduh ka 8 tarik haduh 10 tarik Naitung naduh ka jingleit shaw iaki dieng khlam kumjuh ka Symbood Khnong bad ka Khnong Blai nalor ki jingleh niam, ka Dorbar Niam ka Seinraij Jowai hapoh ka jingpyniaid u Dolloi uba long u khlieh jong ka niam, U ma Puramon Kynjing ha ryngkat bad kiwei nongsharai niam bad ka jingtrei shitom u president bad general secretary Seinraij u ma OR Shallam bad Arwotki Sumer la pynlong ia kane ka Behdieñkhlam kaba jop wat la hap ban pynrit ia ka.

Kumba ka jingmut jong ka Behdieñkhlam ka long ban beh ïaka sniew ka smeh bad ka khlam haka imlang ka sahlang, kumta ruh ha une snem ki rong ki rup bala pynkhreh ki kren shaphang ka khlam COVID-19, ka jingsniew ka imlang sahlang bad kumno ban tyngkai iaka mariang.

Na kaliang u Syllad bad ka kynhun jong u baroh ka ai khublei Behdieñkhlam ia baroh u khun u raiot ka Seinraij Jowai bad ba kan poi sha ka thong ban beh shajngai iaka khlam na kane ka sla pyrthei bad im suk im sain u khun bynriew bad ban roi ban par salonsar.