Lap ka KSU ba kylla jaka bret ñiut ki trok bad kylla ïing jah ka Town Committee Khliehriat

Syllad | The Rising MeghalayaApril 8, 2019

JOWAI: Katba ka Ri India ka dang ïakhun pyrshah ban jop ïaka jingbret pathar lyngba ka Swachh Bharat Mission, ka campaign kaba la sdang naduh u 2014-2019 kaba ka thong kalong ban pynlong ïaki lynti synkieng, surok bad ki jingtei hapoh ka Ri la ha sor ne nongkyndong kiba khuid ba suba, phewse ha Rilum Jaiñtia la lap ba kane ka mission ka phiel.

Ka Khasi Students’ Union (KSU) Khliehriat Circle haka jingleit jurip jong ka haka sngi Nyngkong ïaka ophis Town Committee kaba hap hapoh ka jingpeit ka Jaiñtia Hills Autonomous District Council (JHADC) kaba don ha Khliehriat, East Jaiñtia Hills District kaba dei ban peit ïaka khuid ka suba jong ka shnong Khliehriat la lap pynban ba kane ka ophis kala kylla ïing jah bad ym don nongtrei kiba trei ha katei ka ophis, namar ba la shi snem mynta kim ïoh tulop.

Nalor kata ka KSU kala lap ruh ba ki ar tylli ki trok kit ñiut kane ka ophis, kila shu sah khongreng bad kila kylla long ki jaka bret ñiut kaba la wanrah ka jingsma iwtung kaba lah ban ktah ïaka koit ka khiah u briew.

Ka KSU kala kyntu ïaka JHADC ban shimkhia ban peit ïa ka jingdonkam kane ka committee khnang ba ka jingdon kane ka ophis kan wanrah jong myntoi ïa u paid nongshong shnong.