Lap ka HYC ba jyllei kiba shong beaiñ haka jaka ka Shillong Cantonment Board

Syllad | The Rising MeghalayaApril 26, 2024

Ka Hynniewtrep Youths; Council (HYC) ha ka 25 tarik Iaiong, ka la pynlong ka jingleit jurip kaba kyndit ia ka jaka kaba don sha lyndet jong ka Them Metor ha kaba ka la lap ba ki don haduh kumba 90 haduh 100 tylli ki iing jong ki bar jylla ba shna beaiñ bad kiba la iasyriem kum ki slum hapoh ka jaka kaba hap ha ka jingkhmih jong ka Shillong Cantonment Board (SCB).

Haba kren sha ki lad pathai khubor u President ka Seng HYC u Bah Roykupar Synrem u la ong ba kane ka jingleit jurip ka la wan long hadien ba ki la ioh pdiang ia kiba bun ki jingujor ha kaba iadei bad ka jingjur jong ki kam khaii drok bad ki nongshong shnong beain kaba kynthup ia ki phetwir Rohingya ha kane ka jaka kaba dei jong ka Shillong Cantonment Board kaba don hajan ka Tnat Fire Service.

U la ong ruh ba ha kane ka jingleit jurip la shem ruh ba kine ki briew kiba shong ha kane ka jaka kim dei ruh wat ki nongshong shnong ka Meghalaya namar kiba bun na ki kim don satia wat ia ki EPIC card jong ka Meghalaya namar ki dei kiba la wan na kiwei pat ki jylla lane kiwei pat ki ri.

Nalor kata la shem ruh ba ym tang ba ki don haduh 20-30 ngut kiba shong ba sah hapoh ki kamra kiba rit, hynrei ki la pynkylla ruh ia kane ka jaka kum ka slum area bad kum ka jaka shong jong ki phetwir hapoh kane ka jaka sor.

U nongialam ka Seng u la ong ruh ba kine ki briew kiba sah beain ha kane ka jaka ki la kam ruh ba ki la shong la sah da ki phew snem, hynrei kaba lyngngoh ka long ba wat ia ka lain bording ruh ki la shu tan beain bad ka tnat MeECL kam shym la leh ei ei ia kine ki briew ki bym shym la siew ruh ia ka bai bording.

U Bah Synrem u la ong ruh ba ha ka jingtohkit la shem ba kine ki briew kim shym la ioh satia ia kano kano ka jingbit ban shong ban sah ha kane ka jaka. “Kumta ngi sngew lyngngoh jur ba kumno ka Shillong Cantonment Board kam don jingtip ha kaba iadei bad ka jingdon jong kine kiba shong ba sah beain ha ka jaka puta ka jong ka.”

Halor kane u la ong ba shen ka Seng kan sa leit iakynduh ia ki bor ba dei khmih jong ka Shillong Cantonment Board ban pynthikna ba kan kyndang noh mardor ia kine ki nongshong bein na kane ka jaka