Lahduh u Akashay bad ka Ankita haka Sohra Marathon; Palat 7000 kiba wan iashim bynta

Syllad | The Rising MeghalayaSeptember 22, 2024

Ka jingpynlong ia ka jingiakob mareh thong “3rd Sohra International half Marathon” ha ka 21 tarik mynta u bnai ka la long kaba i shongkun da ka jingdon jong haduh palat 7000 ngut ki nongwan iashim bynta kaba kynthup ia ki shynrang bad kynthei nalor ki rang ia mareh kiba nabar ri kumjuh na ka ri bad khamtam napoh ka Jylla.

Haba phai sha ka jingiakop mareh kaba 21K open category u Akashay Kumar u la long u lahduh da kaba lah ban pyndep ia ka jingmareh ha ka 1:03.00, katba na ka liang ki kynthei la ioh rah da ka Ankita Ben Gavit kaba kaba la lah ban pyndep ha ka 1:40:04.

Kane ka jingiakob ka la long kaba iaid beit iaid ryntih ha kaba kam shym la don kano kano ka jingpynthut na ki  bor ka mariang ha ka por ba la pynlong ia ka jingiamareh na ka bynta ka 21 K, 10K bad 5 K, hynrei ha ka por ba pynkut la sakhi ia ka jingther jong u slap bad ka jingtied pyrthat.

Na ka liang ki paidbah nongshong shnong la sakhi ba ki la mih na la ki jong ki iing ki sem ban ia risa ba ia thap kti  kum ka dak basn ai mynsiem ia ki nongiashim bynta katba ki dang ia mareh lynti lynti khnang ba kin lah ban poi sha ka thong.

Napdeng kine ki laitylli ki jingiakop mareh, ka jingiamreh na ka bynta ka 10K ka dei kaba la kham itynnad bad kham khring ia kiba bun ki nongwan iashim bynta kaba la pynlong ruh ia bor pyniaid ba kin hap ban shimkhia shipor khnang ba kane ka jingiakob mareh kan long da ka lynti kaba dei, bad ki la mih ruh bun ki khep ha kaba la hap ban kyrpad ia ki nongiashim bynta ba kin long kiba jai jai bad ban bud ryntih ia ki jingbthah.

Ha kaba khatduh na ka liang ki bor pyniaid kum ka dak ban pyrto ia ka jingwan iashim bynta sha kane ka jingiakop ki la sam ruh da ki takma ne ki ‘finisher medal’ khnang ba kan long kum ka jingsah kynmaw na ka bynta baroh ki nongwan iashim bynta.

Ki katto katne ki riew pawkhmat kiba la wan ban iashim bynta bad ban sakhi ia ka jingialang  sam khusnam ki kynthup ia u bah Kyrmen Shylla myntri ka sorkar jylla, u MLA ka Sohra bah Gavin Miguel Mylliemngap, MDC ka Sohra u bah Titostrawell Chyrne, MLA ka Shella u bah  Balajied Kupar Synrem lem bad ki heh ophisar sorkar.