Lahduh ka kynhun tem Toxic Pony na Jowai ha ka Red Ribbon Superstar Meghalaya Icon, 2023
Ka Toxic Pony ka kynhun tem na Jowai, West Jaintia Hills District ka la ioh ban rah ia ka nam lahduh ha ka “Red Ribbon Superstar Meghalaya Icon, 2023” kaba dei ka jingiakop tem kaba thmu ban ialap bad pynshai paidbah halor ka jingpang HIV/AIDS hapdeng ki samla ha ka jylla.
Da kane ka jingjop ka kynhun Toxic Pony da ka jingsarong ka la ioh ban bat ia ka nam kum ka Ambassador of Meghalaya AIDS Control Society, Shillong. Ia ka kyrdan kaba ar la ioh rah da ka kynhun Band Strange Origin na Tura bad ia kaba lai la ioh rah da ka kynhun Saihon na ka nongbah Shillong.
Ia kane ka jingiakop la pynlong da ka Meghalaya AlDS Control Society, Shillong ha ryngkat ka jingiatreilang bad ka Inspire Relations and Communications, Shillong, ia kaba la pynlong da ka jingthmu ban pynlong ia ki khynnah bad samla kiba hapdeng ka rta 15 haduh 29 snem ba kin pyndonkam ia ka bor jong ka tem ka put ban ai jingtip halor ki lad jingiada na ka jingpang HIV /AIDS.
Kane ka jingialap ka dei ruh ka sienjam ba la shim da ka National AIDS Control Organisation bad ka Meghalaya AIDS Control Society ha ka nongbah Shillong.
Ia ki khusnam la sam ruh sha ki kynhun shimet kum ka jingithuh halor ka jingnoh synniang ka jong ki, ha kaba ia ka nam Best Theme Song ka leit sha ka kynhun tem Saihon na Shillong.
Ia ka nam nongrwai ba tbit tam la ioh rah da u Sunny Tengban R Marak na ka kynhun Strange Origin, Best Guitarist Batistuta Jachon M Marak na ka kynhun Strange Origin, Best Bassist la ioh rah da u Shantre Dame M Lamare katba ia ka nam Best Drummer la ioh rah da u Dolreich B Kharmawphlang na ka kynhun Saihon.
Ia ki khusnam la sam da u Dr. B Decruse, Project Director, MACS, Kong Emily Wahlang, Deputy Director, Finance, DHS.
La plie ia kane ka jingiakop Meghalaya Icon lyngba ka jingkaweh lama da u Dr. B Decruse, Project Director of Meghalaya AIDS Control Society, Shillong, ha ka jingiadon lang u TLM Sangma, MJS (Meghalaya Judicial Service), uba la ai ka jingkren lyngkot ha kaba iadei bad ki kyndon ain.
Leave a Reply